rafta rafta manzar-e-shab tab bhi aa jaenge

rafta rafta manzar-e-shab taab bhī aa jā.eñge

niiñd to aa jaa.e pahle ḳhvāb bhī aa jā.eñge

kyā pata thā ḳhuun ke aañsū rulā deñge mujhe

is kahānī meñ kuchh aise baab bhī aa jā.eñge

ḳhushk āñkhoñ ne to shāyad ye kabhī sochā na thā

ek din sahrāoñ meñ sailāb bhī aa jā.eñge

hausle yuuñ hī agar baḌhte ga.e to dekhnā

sāhiloñ tak ek din girdāb bhī aa jā.eñge

bas zarā milne to do merī tabāhī kī ḳhabar

dil dukhāne ke liye ahbāb bhī aa jā.eñge

aap kī bazm-e-mohazzab meñ nayā huuñ 'shād' maiñ

aate aate bazm ke ādāb bhī aa jā.eñge

rafta rafta manzar-e-shab tab bhi aa jaenge

nind to aa jae pahle KHwab bhi aa jaenge

kya pata tha KHun ke aansu rula denge mujhe

is kahani mein kuchh aise bab bhi aa jaenge

KHushk aankhon ne to shayad ye kabhi socha na tha

ek din sahraon mein sailab bhi aa jaenge

hausle yun hi agar baDhte gae to dekhna

sahilon tak ek din girdab bhi aa jaenge

bas zara milne to do meri tabahi ki KHabar

dil dukhane ke liye ahbab bhi aa jaenge

aap ki bazm-e-mohazzab mein naya hun 'shad' main

aate aate bazm ke aadab bhi aa jaenge