rah-e-shauq se ab haTa chahta hun

rah-e-shauq se ab haTā chāhtā huuñ

kashish husn kī dekhnā chāhtā huuñ

koī dil sā dard-āshnā chāhtā huuñ

rah-e-ishq meñ rahnumā chāhtā huuñ

tujhī se tujhe chhīnnā chāhtā huuñ

ye kyā chāhtā huuñ ye kyā chāhtā huuñ

ḳhatāoñ pe jo mujh ko maa.il kare phir

sazā aur aisī sazā chāhtā huuñ

vo maḳhmūr nazreñ vo mad.hosh āñkheñ

ḳharāb-e-mohabbat huā chāhtā huuñ

vo āñkheñ jhukīñ vo koī muskurāyā

payām-e-mohabbat sunā chāhtā huuñ

tujhe DhūñDhtā huuñ tirī justujū hai

mazā hai ki ḳhud gum huā chāhtā huuñ

ye maujoñ kī be-tābiyāñ kaun dekhe

maiñ sāhil se ab lauTnā chāhtā huuñ

kahāñ kā karam aur kaisī ināyat

'majāz' ab jafā hī jafā chāhtā huuñ

rah-e-shauq se ab haTa chahta hun

kashish husn ki dekhna chahta hun

koi dil sa dard-ashna chahta hun

rah-e-ishq mein rahnuma chahta hun

tujhi se tujhe chhinna chahta hun

ye kya chahta hun ye kya chahta hun

KHataon pe jo mujh ko mail kare phir

saza aur aisi saza chahta hun

wo maKHmur nazren wo madhosh aankhen

KHarab-e-mohabbat hua chahta hun

wo aankhen jhukin wo koi muskuraya

payam-e-mohabbat suna chahta hun

tujhe DhunDhta hun teri justuju hai

maza hai ki KHud gum hua chahta hun

ye maujon ki be-tabiyan kaun dekhe

main sahil se ab lauTna chahta hun

kahan ka karam aur kaisi inayat

'majaz' ab jafa hi jafa chahta hun