rah-e-wafa mein ba-sad-shauq jab bhi hum nikle

rah-e-vafā meñ ba-sad-shauq jab bhī ham nikle

qadam qadam pe sabhī mā.il-e-sitam nikle

nahīñ ye gesū-e-jānāñ ye zulf-e-gītī hai

har ek biich meñ pinhāñ hazāroñ ḳham nikle

anā-pasandī-e-fitrat ko ab qarār kahāñ

bahisht chhoḌ ke mushkil safar pe ham nikle

milī na manzil-e-jānāñ rakhe na pā-e-talab

qadam qadam pe muqaddar ke pech-o-ḳham nikle

junūn-e-shauq meñ jin ko samajh rahā thā ḳhudā

paḌā jo vaqt to miTTī ke vo sanam nikle

tamām umr chale saath phir bhī saath the kab

'majīd' ḳhuub tumhāre ye ham-qadam nikle

rah-e-wafa mein ba-sad-shauq jab bhi hum nikle

qadam qadam pe sabhi mail-e-sitam nikle

nahin ye gesu-e-jaanan ye zulf-e-giti hai

har ek bich mein pinhan hazaron KHam nikle

ana-pasandi-e-fitrat ko ab qarar kahan

bahisht chhoD ke mushkil safar pe hum nikle

mili na manzil-e-jaanan rakhe na pa-e-talab

qadam qadam pe muqaddar ke pech-o-KHam nikle

junun-e-shauq mein jin ko samajh raha tha KHuda

paDa jo waqt to miTTi ke wo sanam nikle

tamam umr chale sath phir bhi sath the kab

'majid' KHub tumhaare ye ham-qadam nikle