rah kar makan mein mere mehman jaiye

rah kar makān meñ mire mehmān jā.iye

merā bhī ek baar kahā maan jā.iye

kahtā har ek hai tirī tasvīr dekh kar

is shakl is shabīh ke qurbān jā.iye

mujh ko pilā ke bazm meñ kahne lage vo aaj

bas jā.iye yahāñ se mirī jaan jā.iye

sumbul ne aaj nargis-e-hairāñ se ye kahā

jab jā.iye chaman meñ pareshān jā.iye

maiñ ne kahā ye un se jab aa.e vo vaqt-e-naz.a

hai āḳhirī savāl mirā maan jā.iye

naqsh-e-qadam tirā hai har ik ġhairat-e-chaman

ai yaar terī chaal ke qurbān jā.iye

ai yaar dekh zulf-e-mo.ambar na khol tū

aage hī dil hai apnā pareshān jā.iye

jis se kabhī thā tum ko shab-o-roz iḳhtilāt

ye hai vahī to 'mashriqī' pahchān jā.iye

rah kar makan mein mere mehman jaiye

mera bhi ek bar kaha man jaiye

kahta har ek hai teri taswir dekh kar

is shakl is shabih ke qurban jaiye

mujh ko pila ke bazm mein kahne lage wo aaj

bas jaiye yahan se meri jaan jaiye

sumbul ne aaj nargis-e-hairan se ye kaha

jab jaiye chaman mein pareshan jaiye

main ne kaha ye un se jab aae wo waqt-e-naza

hai aaKHiri sawal mera man jaiye

naqsh-e-qadam tera hai har ek ghairat-e-chaman

ai yar teri chaal ke qurban jaiye

ai yar dekh zulf-e-moambar na khol tu

aage hi dil hai apna pareshan jaiye

jis se kabhi tha tum ko shab-o-roz iKHtilat

ye hai wahi to 'mashriqi' pahchan jaiye