rahe jo zindagi mein zindagi ka aasra ho kar

rahe jo zindagī meñ zindagī kā aasrā ho kar

vahī nikle sarīr-ārā qayāmat meñ ḳhudā ho kar

haqīqat-dar-haqīqat but-kade meñ hai na kaabe meñ

nigāh-e-shauq dhoke de rahī hai rahnumā ho kar

ma.āl-e-kār se gulshan kī har pattī laraztī hai

ki āḳhir rang-o-bū uḌ jā.eñge ik din havā ho kar

abhī kal tak javānī ke ḳhumistāñ the nigāhoñ meñ

ye duniyā do hī din meñ rah ga.ī hai kyā se kyā ho kar

mire sajdoñ kī yā rab tishna-kāmī kyuuñ nahīñ jaatī

ye kyā be-e'tinā.ī apne bande se ḳhudā ho kar

sirisht-e-dil meñ kis ne kuuT kar bhar dī hai betābī

azal meñ kaun yā rab mujh se baiThā thā ḳhafā ho kar

ye pichhlī raat ye ḳhāmoshiyāñ ye Dūbte taare

nigāh-e-shauq bahkī phir rahī hai iltijā ho kar

balā se kuchh ho ham 'ehsān' apnī ḳhū na chhoḌeñge

hamesha be-vafāoñ se mileñge bā-vafā ho kar

rahe jo zindagi mein zindagi ka aasra ho kar

wahi nikle sarir-ara qayamat mein KHuda ho kar

haqiqat-dar-haqiqat but-kade mein hai na kabe mein

nigah-e-shauq dhoke de rahi hai rahnuma ho kar

maal-e-kar se gulshan ki har patti larazti hai

ki aaKHir rang-o-bu uD jaenge ek din hawa ho kar

abhi kal tak jawani ke KHumistan the nigahon mein

ye duniya do hi din mein rah gai hai kya se kya ho kar

mere sajdon ki ya rab tishna-kaami kyun nahin jati

ye kya be-e'tinai apne bande se KHuda ho kar

sirisht-e-dil mein kis ne kuT kar bhar di hai betabi

azal mein kaun ya rab mujh se baiTha tha KHafa ho kar

ye pichhli raat ye KHamoshiyan ye Dubte tare

nigah-e-shauq bahki phir rahi hai iltija ho kar

bala se kuchh ho hum 'ehsan' apni KHu na chhoDenge

hamesha be-wafaon se milenge ba-wafa ho kar