رہین خواب گم گشتہ ہمارے سامنے مت آ

رہین خواب گم گشتہ ہمارے سامنے مت آ

جہاں بھر میں ہو وارفتہ ہمارے سامنے مت آ

دھماکے سے اڑاتے جائیں گے اب راہ کی ہر شے

بنانے دے ہمیں رستہ ہمارے سامنے مت آ

تصادم کے علاوہ ان گنت ضمنی مسائل ہیں

تری ہستی سے وابستہ ہمارے سامنے مت آ

نواح چشم کا موسم بدلنا ہے تعاون کر

یہی بس ایک دو ہفتہ ہمارے سامنے مت آ

منافق پھول بھی لائے تو کانٹے ساتھ آتے ہیں

اٹھا اپنا یہ گلدستہ ہمارے سامنے مت آ

خدارا کیمروں اور آئنوں سے معذرت کر لی

ہمارے عکس رو خستہ ہمارے سامنے مت آ

ہمارے سامنے پھیلے سوالوں سے بھرے نقشے

تجھے کر دیں گے خود رفتہ ہمارے سامنے مت آ

اگر تو سامنے آیا تو کھل جائیں گے پشتارے

ہمیں رہنے دے لب بستہ ہمارے سامنے مت آ

غرض داری کی خار آور محبت خور بیلیں ہیں

ترے پیکر سے پیوستہ ہمارے سامنے مت آ

ہمیں پہلے قدم سے علم ہے یہ دھول کس کی ہے

عقب میں ہے ترا دستہ ہمارے سامنے مت آ

کبھی وہ سامنے آئے تو ہم ہٹ بھی نہیں سکتے

کہے جاتے ہیں بر جستہ ہمارے سامنے مت آ