rahin-e-KHwab-e-gum-gashta hamare samne mat aa

rahīn-e-ḳhvāb-e-gum-gashta hamāre sāmne mat aa

jahāñ bhar meñ ho vārafta hamāre sāmne mat aa

dhamāke se uḌāte jā.eñge ab raah kī har shai

banāne de hameñ rasta hamāre sāmne mat aa

tasādum ke alāva an-ginat zimnī masā.il haiñ

tirī hastī se vābasta hamāre sāmne mat aa

navāh-e-chashm kā mausam badalnā hai ta.āvun kar

yahī bas ek do hafta hamāre sāmne mat aa

munāfiq phuul bhī laa.e to kāñTe saath aate haiñ

uThā apnā ye guldasta hamāre sāmne mat aa

ḳhudārā cameroñ aur ā.inoñ se ma.azarat kar lī

hamāre aks-e-rū-ḳhasta hamāre sāmne mat aa

hamāre sāmne phaile savāloñ se bhare naqshe

tujhe kar deñge ḳhud-rafta hamāre sāmne mat aa

agar tū sāmne aayā to khul jā.eñge pushtāre

hameñ rahne de lab-basta hamāre sāmne mat aa

ġharaz-dārī kī ḳhār-āvar mohabbat-ḳhor beleñ haiñ

tire paikar se paivasta hamāre sāmne mat aa

hameñ pahle qadam se ilm hai ye dhuul kis kī hai

aqab meñ hai tirā dasta hamāre sāmne mat aa

kabhī vo sāmne aa.e to ham haT bhī nahīñ sakte

kahe jaate haiñ bar-jasta hamāre sāmne mat aa

rahin-e-KHwab-e-gum-gashta hamare samne mat aa

jahan bhar mein ho warafta hamare samne mat aa

dhamake se uDate jaenge ab rah ki har shai

banane de hamein rasta hamare samne mat aa

tasadum ke alawa an-ginat zimni masail hain

teri hasti se wabasta hamare samne mat aa

nawah-e-chashm ka mausam badalna hai taawun kar

yahi bas ek do hafta hamare samne mat aa

munafiq phul bhi lae to kanTe sath aate hain

uTha apna ye guldasta hamare samne mat aa

KHudara cameron aur aainon se mazarat kar li

hamare aks-e-ru-KHasta hamare samne mat aa

hamare samne phaile sawalon se bhare naqshe

tujhe kar denge KHud-rafta hamare samne mat aa

agar tu samne aaya to khul jaenge pushtare

hamein rahne de lab-basta hamare samne mat aa

gharaz-dari ki KHar-awar mohabbat-KHor belen hain

tere paikar se paiwasta hamare samne mat aa

hamein pahle qadam se ilm hai ye dhul kis ki hai

aqab mein hai tera dasta hamare samne mat aa

kabhi wo samne aae to hum haT bhi nahin sakte

kahe jate hain bar-jasta hamare samne mat aa