rakhen hain sahra jo itne to jhil bhi rakkho

rakheñ haiñ sahrā jo itne to jhiil bhī rakkho

kabhī visāl ko thoḌā tavīl bhī rakkho

use kaho koī tasvīr bhej de apnī

jo jī rahe ho to koī dalīl bhī rakkho

na jaane kaun se ash.ār kis ko chubh jaa.eñ

jo sachche sher haiñ kahne vakīl bhī rakkho

tumheñ bhī chāhiye izzat agar zamāne se

to apne aap ko thoḌā zalīl bhī rakkho

tamām logoñ kī sargarmiyoñ kā mausam hai

junūñ ke shahr meñ koī sabīl bhī rakho

utaar kar ye udāsī kabhī to Taañg sako

kisī divāl pe ik aisī kiil bhī rakkho

baḌe maze kī savārī hai dil kā ye TaTTū

lagām kas ke rakho aur Dhiil bhī rakkho

ġhamoñ kī sohbateñ achchhī na fāsle achchhe

inheñ hisār meñ rakkho fasīl bhī rakkho

rakhen hain sahra jo itne to jhil bhi rakkho

kabhi visal ko thoDa tawil bhi rakkho

use kaho koi taswir bhej de apni

jo ji rahe ho to koi dalil bhi rakkho

na jaane kaun se ashaar kis ko chubh jaen

jo sachche sher hain kahne wakil bhi rakkho

tumhein bhi chahiye izzat agar zamane se

to apne aap ko thoDa zalil bhi rakkho

tamam logon ki sargarmiyon ka mausam hai

junun ke shahr mein koi sabil bhi rakho

utar kar ye udasi kabhi to Tang sako

kisi diwal pe ek aisi kil bhi rakkho

baDe maze ki sawari hai dil ka ye TaTTu

lagam kas ke rakho aur Dhil bhi rakkho

ghamon ki sohbaten achchhi na fasle achchhe

inhen hisar mein rakkho fasil bhi rakkho