rang aur rup ke pardip mein khone de mujhe

rañg aur ruup ke pardīp meñ khone de mujhe

ḳhud ko chāhat kī chaḌhī rau meñ Dubone de mujhe

tū agar ḳhush hai to jā qāfiya-paimā.ī kar

sher ko ruuh kī laḌiyoñ meñ pirone de mujhe

priit kā ant bichhaḌnā hai magar aur abhī

apnī bāhoñ ke kañval-kund meñ sone de mujhe

chuum kar is ke madhur hoñToñ kī ras-vant laveñ

zehn ko nashshoñ bharī mai se bhigone de mujhe

kashT vājib na sahī kaliyāñ to kāñTe hī qubūl

na.ī rut meñ na.e ehsās ko bone de mujhe

terā rishta hai falak se to zamīñ ko na ujaaḌ

narm miTTī kī mahak man meñ samone de mujhe

'hāfiz'-o-'mīr' se nisbat bhī bajā lekin... ab

ḳhitta-e-pāk kī is ḳhaak kā hone de mujhe

yaad aa jaa.e na jaane use bachpan kī lagan

isī jañgal meñ isī jhiil pe rone de mujhe

husn takrīm sahī chāhatīñ tāzīm sahī

haath ab aap shafaq-tāb meñ dhone de mujhe

rang aur rup ke pardip mein khone de mujhe

KHud ko chahat ki chaDhi rau mein Dubone de mujhe

tu agar KHush hai to ja qafiya-paimai kar

sher ko ruh ki laDiyon mein pirone de mujhe

prit ka ant bichhaDna hai magar aur abhi

apni bahon ke kanwal-kund mein sone de mujhe

chum kar is ke madhur honTon ki ras-want lawen

zehn ko nashshon bhari mai se bhigone de mujhe

kashT wajib na sahi kaliyan to kanTe hi qubul

nai rut mein nae ehsas ko bone de mujhe

tera rishta hai falak se to zamin ko na ujaD

narm miTTi ki mahak man mein samone de mujhe

'hafiz'-o-'mir' se nisbat bhi baja lekin ab

KHitta-e-pak ki is KHak ka hone de mujhe

yaad aa jae na jaane use bachpan ki lagan

isi jangal mein isi jhil pe rone de mujhe

husn takrim sahi chahatin tazim sahi

hath ab aap shafaq-tab mein dhone de mujhe