rang mausam ke sath lae hain

rañg mausam ke saath laa.e haiñ

ye parinde kahāñ se aa.e haiñ

baiTh jaate haiñ rāh-rau thak kar

kitne himmat-shikan ye saa.e haiñ

dhuup apnī zamīn hai apnī

peḌ apne nahīñ parā.e haiñ

apne ahbāb kī ḳhushī ke liye

bilā-irāda bhī muskurā.e haiñ

dushmanoñ ko qarīb se dekhā

dostoñ ke fareb khaa.e haiñ

ham ne toḌā hai zulmatoñ kā fusūñ

raushnī ke bhī tiir khaa.e haiñ

dekh le muḌ ke mahv-e-ārā.ish

ā.īna ban ke ham bhī aa.e haiñ

pai-ba-pai raah kī shikastoñ ne

hausle aur bhī baḌhā.e haiñ

zindagī hai usī kā naam 'e'jāz'

haiñ vo apne jo ġham parā.e haiñ

rang mausam ke sath lae hain

ye parinde kahan se aae hain

baiTh jate hain rah-rau thak kar

kitne himmat-shikan ye sae hain

dhup apni zamin hai apni

peD apne nahin parae hain

apne ahbab ki KHushi ke liye

bila-irada bhi muskurae hain

dushmanon ko qarib se dekha

doston ke fareb khae hain

hum ne toDa hai zulmaton ka fusun

raushni ke bhi tir khae hain

dekh le muD ke mahw-e-araish

aaina ban ke hum bhi aae hain

pai-ba-pai rah ki shikaston ne

hausle aur bhi baDhae hain

zindagi hai usi ka nam 'e'jaz'

hain wo apne jo gham parae hain