ras gholte shirin lafzon ki tasir se KHushbu aati hai

ras gholte shīrīñ lafzoñ kī tāsīr se ḳhushbū aatī hai

andāz-e-bayāñ se lahje se taqrīr se ḳhushbū aatī hai

sab harf chamakne lagte haiñ jab harf-e-tamannā likhtā huuñ

har saañs mahakne lagtī hai tahrīr se ḳhushbū aatī hai

maiñ raat ga.e sannāToñ meñ tā'bīreñ likhtā rahtā huuñ

jab girheñ khulne lagtī haiñ tā'bīr se ḳhushbū aatī hai

jab zulm hisār banātā hai to ḳhauf kī sarhad bantī hai

jab 'ishq hisār banātā hai zanjīr se ḳhushbū aatī hai

ik 'ishq-ābād basāne meñ yā'nī puure afsāne meñ

tahzīb-e-tamannā meñ khoī tā'mīr se ḳhushbū aatī hai

ras gholte shirin lafzon ki tasir se KHushbu aati hai

andaz-e-bayan se lahje se taqrir se KHushbu aati hai

sab harf chamakne lagte hain jab harf-e-tamanna likhta hun

har sans mahakne lagti hai tahrir se KHushbu aati hai

main raat gae sannaTon mein ta'biren likhta rahta hun

jab girhen khulne lagti hain ta'bir se KHushbu aati hai

jab zulm hisar banata hai to KHauf ki sarhad banti hai

jab 'ishq hisar banata hai zanjir se KHushbu aati hai

ek 'ishq-abaad basane mein ya'ni pure afsane mein

tahzib-e-tamanna mein khoi ta'mir se KHushbu aati hai