rasm-e-duniya to kisi taur nibhate jao

rasm-e-duniyā to kisī taur nibhāte jaao

dil nahīñ milte bhī to haath milāte jaao

kabhī chaTTān ke siine se kabhī baazū se

bahte paanī kī tarah raah banāte jaao

teġh uThtī nahīñ hai tum se jo zālim ke ḳhilāf

haq meñ mazlūm ke āvāz uThāte jaao

log samjheñge ki hai shaḳhs baḌā shā.ista

tum har ik baat pe bas naak chaḌhāte jaao

tum sitāroñ ke bharose pe na baiThe rahnā

apnī tadbīr se taqdīr banāte jaao

ik na ik roz rifāqat meñ badal jā.egī

dushmanī ko bhī salīqe se nibhāte jaao

aur kuchh bhī nahīñ jab ai 'sadā' tum se hotā

sher likh likh ke zamāne ko sunāte jaao

rasm-e-duniya to kisi taur nibhate jao

dil nahin milte bhi to hath milate jao

kabhi chaTTan ke sine se kabhi bazu se

bahte pani ki tarah rah banate jao

tegh uThti nahin hai tum se jo zalim ke KHilaf

haq mein mazlum ke aawaz uThate jao

log samjhenge ki hai shaKHs baDa shaista

tum har ek baat pe bas nak chaDhate jao

tum sitaron ke bharose pe na baiThe rahna

apni tadbir se taqdir banate jao

ek na ek roz rifaqat mein badal jaegi

dushmani ko bhi saliqe se nibhate jao

aur kuchh bhi nahin jab ai 'sada' tum se hota

sher likh likh ke zamane ko sunate jao