ردائے ابر نہیں خیمۂ غبار نہیں

ردائے ابر نہیں خیمۂ غبار نہیں

مرا سفر کسی پہلو سے سازگار نہیں

تنی ہوئی ہے دھنک کی طرح لہو کی کماں

لگا وہ تیر جو منظر کے آر پار نہیں

ہماری راہ سے لشکر غموں کے گزرے ہیں

ہمارے جسم پہ زخموں کا کچھ شمار نہیں

کھلی ہوئی ہے زمستاں کی دھوپ آنگن میں

چلے بھی آؤ کہ موسم کا اعتبار نہیں

کچھ اور دیر جلائے رکھو لہو کے چراغ

خلیج شب ہے یہ صحرائے بے کنار نہیں

ہماری خاک کو رکھ کر ہوا کے رستے میں

دیا ہے غم بھی اک ایسا جو پائیدار نہیں