روک دے اس کو بھلا کس کی مجال آتا ہے

روک دے اس کو بھلا کس کی مجال آتا ہے

ہر ترقی کے تعاقب میں زوال آتا ہے

لرزہ انگیز سہی تمکنت تخت شہی

لیک جب عرش معلیٰ کو جلال آتا ہے

ایک دل پیار بھرا سب کے لئے لایا ہوں

نہ مجھے اور کوئی فن نہ کمال آتا ہے

میں نے مرشد سے دعا چاہی تو ہنس کر یہ کہا

پیار گھر چھوڑ کے جاتا ہے جو مال آتا ہے

جب یہ افتاد پڑی مجھ پہ سمجھ میں آیا

ایک شیشے کی طرح دل میں بھی بال آتا ہے

ناگ کا زہر بھی شیریں ہے ذرا یاد رہے

سر منبر کوئی نو شینا مقال آتا ہے

دیکھتے جائیے سامع نظر آنے کے نہیں

انجمن میں وہ کوئی خیر سگال آتا ہے

ستم ایجاد نہ کر اے ستم ایجاد بہت

تیرے سر کتنی ہی نسلوں کا وبال آتا ہے

دونوں پیدا تو کھنکتی ہوئی مٹی سے ہوئے

تال پر تم کو مجھے قال پہ حال آتا ہے

دل تو پھر دل ہے میاں ذہن بھی قابو میں کہاں

جس کو چاہو کہ نہ آئے وہ خیال آتا ہے

اب تو پنگھٹ کی وہ دوشیزہ تلاشو جس کو

نہ بھر آتا ہے نہ مشکیزہ سنبھال آتا ہے

اک مجانین کی دنیا ہے یہ جادو نگری

بس یہ دیکھو کہ کسے سحر حلال آتا ہے

خود فریبی تو ہیں مشتاق کہ اس دست میں کب

آسماں رنگ فسوں ساز شغال آتا ہے

منتظر بیٹھے ہیں ہم بھی کہ پئے داد غزل

ضیغم آتا ہے کوئی کوئی غزال آتا ہے

ہنسنے والے کہیں کچھ سوچ کے رونے نہ لگیں

بزم میں کوثرؔ آشفتہ‌ خیال آتا ہے