rujua karte hue apne muddaa se main

rujūa karte hue apne mudda.ā se maiñ

tire alāva bhī kuchh maañg luuñ ḳhudā se maiñ

koī charāġh agar ho mire ta.āqub meñ

thakan sameTtā jā.ūñ nuqūsh-e-pā se maiñ

faqīr huuñ isī kūche meñ ḳhaak phāñktā huuñ

sadā lagā nahīñ saktā magar hayā se maiñ

rukūñgā jā ke kisī ḳhūb-rū kī chaukhaT par

galī meñ phuul khilātā huā duā se maiñ

kabhī kabhī yūñhī apne se pūchh letā huuñ

kisī ke khoj meñ niklā thā kab sabā se maiñ

mire baġhair mukammal nahīñ hai ye duniyā

ki is qaziye meñ shāmil huuñ ibtidā se maiñ

shaguft hotā huā aa.ina hai dil merā

mire ḳhudā abhī mahfūz huuñ riyā se maiñ

ragoñ meñ barf banī niiñd ke pighalne par

tumheñ pukārte niklūñgā nainvā se maiñ

sunā hai raah meñ hote haiñ sāya-dār shajar

kabhī milūñgā kisī dard-āshnā se maiñ

lagā rahūñgā yūñhī vasl kī tag-o-dau meñ

marūñ ki zinda rahūñ aap kī balā se maiñ

gulāb khilne lage haiñ mirī rag-o-pai meñ

kahūñgā jā ke chaman meñ kabhī sabā se maiñ

hadaf banā.ūñ kisī sūrmā ko ab 'sājid'

tamām umr na laḌtā rahūñ havā se maiñ

rujua karte hue apne muddaa se main

tere alawa bhi kuchh mang lun KHuda se main

koi charagh agar ho mere taaqub mein

thakan sameTta jaun nuqush-e-pa se main

faqir hun isi kuche mein KHak phankta hun

sada laga nahin sakta magar haya se main

rukunga ja ke kisi KHub-ru ki chaukhaT par

gali mein phul khilata hua dua se main

kabhi kabhi yunhi apne se puchh leta hun

kisi ke khoj mein nikla tha kab saba se main

mere baghair mukammal nahin hai ye duniya

ki is qaziye mein shamil hun ibtida se main

shaguft hota hua aaina hai dil mera

mere KHuda abhi mahfuz hun riya se main

ragon mein barf bani nind ke pighalne par

tumhein pukarte niklunga nainwa se main

suna hai rah mein hote hain saya-dar shajar

kabhi milunga kisi dard-ashna se main

laga rahunga yunhi wasl ki tag-o-dau mein

marun ki zinda rahun aap ki bala se main

gulab khilne lage hain meri rag-o-pai mein

kahunga ja ke chaman mein kabhi saba se main

hadaf banaun kisi surma ko ab 'sajid'

tamam umr na laDta rahun hawa se main