ruswai ka bhi jashn manane lage hain log

rusvā.ī kā bhī jashn manāne lage haiñ log

ḳhud-sāḳhta fareb bhī khāne lage haiñ log

taz.īn-e-kā.enāt kā ab hausla kahāñ

bār-e-ġham-e-hayāt uThāne lage haiñ log

jazbāt meñ junūn kā 'unsur nahīñ rahā

rishte ko misl-e-rasm nibhāne lage haiñ log

vo naqsh-pā-e-rāh jo manzil kā hai surāġh

vo naqsh-pā-e-rāh miTāne lage haiñ log

ik ‘arsa-e-darāz rahī be-ḳhudī magar

sad-āfrīñ ki hosh meñ aane lage haiñ log

afsānvī ḳhayāl ke dilkash fareb meñ

dāman haqīqatoñ se bachāne lage haiñ log

kam-zarf is qadar haiñ gumāñ tak na thā mujhe

'ash.har' charāġh-e-rāh bujhāne lage haiñ log

ruswai ka bhi jashn manane lage hain log

KHud-saKHta fareb bhi khane lage hain log

tazin-e-kaenat ka ab hausla kahan

bar-e-gham-e-hayat uThane lage hain log

jazbaat mein junun ka 'unsur nahin raha

rishte ko misl-e-rasm nibhane lage hain log

wo naqsh-pa-e-rah jo manzil ka hai suragh

wo naqsh-pa-e-rah miTane lage hain log

ek ‘arsa-e-daraaz rahi be-KHudi magar

sad-afrin ki hosh mein aane lage hain log

afsanwi KHayal ke dilkash fareb mein

daman haqiqaton se bachane lage hain log

kam-zarf is qadar hain guman tak na tha mujhe

'ashhar' charagh-e-rah bujhane lage hain log