ruh par zulm Dha raha hun main

ruuh par zulm Dhā rahā huuñ maiñ

aur sab se chhupā rahā huuñ maiñ

pyaas meñ zahr pī rahā huuñ maiñ

bhuuk meñ zaḳhm khā rahā huuñ maiñ

shā'irī meñ sabhī ko uljhā kar

asl maqsad chhupā rahā huuñ maiñ

maiñ yaqīnan bahut ghinaunā huuñ

aap ko sach batā rahā huuñ maiñ

sab diyā hai mujhe mire rab ne

shor bejā machā rahā huuñ maiñ

'umr saarī 'amal se ḳhālī hai

sirf bāteñ banā rahā huuñ maiñ

bhauñktā huuñ jalī-kaTī bāteñ

aap kā dil dukhā rahā huuñ maiñ

duur ho kar tirī mohabbat se

sirf ḳhud ko jalā rahā huuñ maiñ

har ghaḌī soch soch kar dil ko

aag hī to lagā rahā huuñ maiñ

haiñ bahut sī burā.iyāñ mujh meñ

aap ko kam ginā rahā huuñ maiñ

ḳhud ko itnā tabāh kar ke bhī

dekh ḳhushiyāñ manā rahā huuñ maiñ

shā'irī meñ lahū chhiḌak kar ke

ek sho'la bujhā rahā huuñ maiñ

maiñ bhale hī tabāh ho jā.ūñ

aap ko to bachā rahā huuñ maiñ

baat mat mānñā kabhī merī

jhuuT hī boltā rahā huuñ maiñ

aaj ḳhud ko burā bhalā kah kar

aa.ina hī dikhā rahā huuñ maiñ

ruh par zulm Dha raha hun main

aur sab se chhupa raha hun main

pyas mein zahr pi raha hun main

bhuk mein zaKHm kha raha hun main

sha'iri mein sabhi ko uljha kar

asl maqsad chhupa raha hun main

main yaqinan bahut ghinauna hun

aap ko sach bata raha hun main

sab diya hai mujhe mere rab ne

shor beja macha raha hun main

'umr sari 'amal se KHali hai

sirf baaten bana raha hun main

bhaunkta hun jali-kaTi baaten

aap ka dil dukha raha hun main

dur ho kar teri mohabbat se

sirf KHud ko jala raha hun main

har ghaDi soch soch kar dil ko

aag hi to laga raha hun main

hain bahut si buraiyan mujh mein

aap ko kam gina raha hun main

KHud ko itna tabah kar ke bhi

dekh KHushiyan mana raha hun main

sha'iri mein lahu chhiDak kar ke

ek sho'la bujha raha hun main

main bhale hi tabah ho jaun

aap ko to bacha raha hun main

baat mat manna kabhi meri

jhuT hi bolta raha hun main

aaj KHud ko bura bhala kah kar

aaina hi dikha raha hun main