saf baaton mein to kudurat hai

saaf bātoñ meñ to kudūrat hai

aur lagāvaT se zāhir ulfat hai

ġhair se bhī kabhī to bigḌegī

rūThnā to tumhārī aadat hai

aap ke lutf meñ to shak hī nahīñ

dil ko kis baat kī shikāyat hai

us sitamgar se shikva kaise ho

aur ulTī mujhe nadāmat hai

bole dikhlā ke ā.īna shab-e-vasl

dekhiye to yahī vo sūrat hai

maut ko bhī nazar nahīñ aatā

nā-tavānī nahīñ qayāmat hai

kuchh kahā hogā us ne bhī qāsid

kuchh na kuchh terī bhī sharārat hai

kaho sab kuchh na rūThne kī kaho

ye hī kahnā tumhārā aafat hai

vaah kyā terī shā.irī hai 'nizām'

kyā fasāhat hai kyā balāġhat hai

saf baaton mein to kudurat hai

aur lagawaT se zahir ulfat hai

ghair se bhi kabhi to bigDegi

ruThna to tumhaari aadat hai

aap ke lutf mein to shak hi nahin

dil ko kis baat ki shikayat hai

us sitamgar se shikwa kaise ho

aur ulTi mujhe nadamat hai

bole dikhla ke aaina shab-e-wasl

dekhiye to yahi wo surat hai

maut ko bhi nazar nahin aata

na-tawani nahin qayamat hai

kuchh kaha hoga us ne bhi qasid

kuchh na kuchh teri bhi shararat hai

kaho sab kuchh na ruThne ki kaho

ye hi kahna tumhaara aafat hai

wah kya teri shairi hai 'nizam'

kya fasahat hai kya balaghat hai