sahib-e-mehr-o-wafa arz-o-sama kyun chup hai

sāhib-e-mehr-o-vafā arz-o-samā kyuuñ chup hai

ham pe to vaqt ke pahre haiñ ḳhudā kyuuñ chup hai

be-sabab ġham meñ sulagnā mirī aadat hī sahī

saaz ḳhāmosh hai kyuuñ shola-navā kyuuñ chup hai

phuul to sahm ga.e dast-e-karam se dam-e-sub.h

gungunātī huī āvāra sabā kyuuñ chup hai

ḳhatm hogā na kabhī silsila-e-ahl-e-vafā

soch ai dāvar-e-maqtal ye fazā kyuuñ chup hai

mujh pe taarī hai rah-e-ishq kī āsūda thakan

tujh pe kyā guzrī mire chāñd batā kyuuñ chup hai

jānñe vaale to sab jaan ga.e hoñge 'alīm'

ek muddat se tirā zehn-e-rasā kyuuñ chup hai

sahib-e-mehr-o-wafa arz-o-sama kyun chup hai

hum pe to waqt ke pahre hain KHuda kyun chup hai

be-sabab gham mein sulagna meri aadat hi sahi

saz KHamosh hai kyun shola-nawa kyun chup hai

phul to sahm gae dast-e-karam se dam-e-subh

gungunati hui aawara saba kyun chup hai

KHatm hoga na kabhi silsila-e-ahl-e-wafa

soch ai dawar-e-maqtal ye faza kyun chup hai

mujh pe tari hai rah-e-ishq ki aasuda thakan

tujh pe kya guzri mere chand bata kyun chup hai

jaanne wale to sab jaan gae honge 'alim'

ek muddat se tera zehn-e-rasa kyun chup hai