sahil ki ret chand ke munh par na Daliye

sāhil kī ret chāñd ke muñh par na Dāliye

himmat jo ho to bahr se motī nikāliye

ḳhushbū kī tarah thaam ke chaliye havā kā haath

misl-e-ġhubār bojh fazā par na Dāliye

āvāra mausamoñ ke bagūloñ ke saath saath

phirtā hai koī mujh ko havā-dar-havā liye

khultā nahīñ ki kis ke liye sargirāñ huuñ maiñ

qadmoñ meñ ḳhaak sar pe falak kī ridā liye

saa.e kī tarah reñg rahā huuñ zamīn par

guzre hue zamānoñ kī āvāz-e-pā liye

ik harf mere kaan meñ kahtā hai rāt-din

mujh ko kitāb-e-ḳhāk se bāhar nikāliye

mumkin hai koī shakl ubhar aa.e sāmne

ā.īna-e-ḳhalā meñ koī aks Dāliye

āzād ho sakā na badan qaid-e-ḳhāk se

har-chand ham ne paañv havā meñ jamā liye

ik sham-e-be-nishāñ kā pata DhūñDte hue

ham ne dil-o-nigāh ke sūraj bujhā liye

sahil ki ret chand ke munh par na Daliye

himmat jo ho to bahr se moti nikaliye

KHushbu ki tarah tham ke chaliye hawa ka hath

misl-e-ghubar bojh faza par na Daliye

aawara mausamon ke bagulon ke sath sath

phirta hai koi mujh ko hawa-dar-hawa liye

khulta nahin ki kis ke liye sargiran hun main

qadmon mein KHak sar pe falak ki rida liye

sae ki tarah reng raha hun zamin par

guzre hue zamanon ki aawaz-e-pa liye

ek harf mere kan mein kahta hai raat-din

mujh ko kitab-e-KHak se bahar nikaliye

mumkin hai koi shakl ubhar aae samne

aaina-e-KHala mein koi aks Daliye

aazad ho saka na badan qaid-e-KHak se

har-chand hum ne panw hawa mein jama liye

ek sham-e-be-nishan ka pata DhunDte hue

hum ne dil-o-nigah ke suraj bujha liye