sat dariyaon ka pani hai mere kuze mein

saat dariyāoñ kā paanī hai mire kuuze meñ

band ik taaza kahānī hai mire kuuze meñ

tum use paanī samajhte ho to samjho sāhab

ye samundar kī nishānī hai mire kuuze meñ

mere aabā ne javānī meñ mujhe sauñpā thā

mere aabā kī javānī hai mire kuuze meñ

dekhne vaalo na.e naqsh mileñge tum ko

sochne vaalo girānī hai mire kuuze meñ

jaane kis ḳhaak se ye zarf huā hai ta.amīr

jaane kis ghaaT kā paanī hai mire kuuze meñ

aan kī aan guzartā hai zamāna is par

vaqt kī naql-e-makānī hai mire kuuze meñ

chāroñ samtoñ meñ koī shai bhī agar hai maujūd

is ne vo lā ke girānī hai mire kuuze meñ

qarz hai mujh pe jo ik aks-e-tamannā 'āzar'

us ne kyā shakl banānī hai mire kuuze meñ

sat dariyaon ka pani hai mere kuze mein

band ek taza kahani hai mere kuze mein

tum use pani samajhte ho to samjho sahab

ye samundar ki nishani hai mere kuze mein

mere aaba ne jawani mein mujhe saunpa tha

mere aaba ki jawani hai mere kuze mein

dekhne walo nae naqsh milenge tum ko

sochne walo girani hai mere kuze mein

jaane kis KHak se ye zarf hua hai tamir

jaane kis ghaT ka pani hai mere kuze mein

aan ki aan guzarta hai zamana is par

waqt ki naql-e-makani hai mere kuze mein

chaaron samton mein koi shai bhi agar hai maujud

is ne wo la ke girani hai mere kuze mein

qarz hai mujh pe jo ek aks-e-tamanna 'azar'

us ne kya shakl banani hai mere kuze mein