sayon se lipaT rahe the sae

sāyoñ se lipaT rahe the saa.e

dil phir bhī fazā meñ jagmagā.e

be-sarfa bhaTak rahī thiiñ rāheñ

ham nūr-e-sahar ko DhūñD laa.e

ye gardish-e-rozgār kyā hai

ham shām-o-sahar ko dekh aa.e

har sub.h tirī nazar kā partav

har shaam tirī bhavoñ ke saa.e

hai fasl-e-bahār kā ye dastūr

jo aa.e chaman meñ muskurā.e

kyā chiiz hai ye fasāna-e-dil

jab kahne lageñ to bhuul jaa.e

tum hī na samajh sake mirī baat

ab kis kī samajh meñ baat aa.e

suunī rahī intizār kī raat

ashkoñ ne bahut diye jalā.e

vo din jo bahār-e-zindagī the

vo din kabhī lauT kar na aa.e

sayon se lipaT rahe the sae

dil phir bhi faza mein jagmagae

be-sarfa bhaTak rahi thin rahen

hum nur-e-sahar ko DhunD lae

ye gardish-e-rozgar kya hai

hum sham-o-sahar ko dekh aae

har subh teri nazar ka partaw

har sham teri bhawon ke sae

hai fasl-e-bahaar ka ye dastur

jo aae chaman mein muskurae

kya chiz hai ye fasana-e-dil

jab kahne lagen to bhul jae

tum hi na samajh sake meri baat

ab kis ki samajh mein baat aae

suni rahi intizar ki raat

ashkon ne bahut diye jalae

wo din jo bahaar-e-zindagi the

wo din kabhi lauT kar na aae