sab kahin pichhe chhuT-chhaT gae

sab kahīñ pīchhe chhūT-chhāT ga.e

vo zamāne vo ThāT-bāT ga.e

kaun tolegā tujh ko phūloñ meñ

vo tarāzū ga.ī vo baaT ga.e

ham se achchhe rahe hamāre buzurg

zindagī sādgī se kaaT ga.e

ab rahā kyā hai in kitāboñ meñ

kaam kī bāteñ log chaaT ga.e

phir kahīñ bhī ye jī lagā hī nahīñ

ham to jaane ko ghaaT ghaaT ga.e

pyaas apnī bujhā ke pāgal log

sab kueñ rāste ke paaT ga.e

jaane kis ke hisāb meñ 'ālam'

rāteñ bojhal to din sapāT ga.e

sab kahin pichhe chhuT-chhaT gae

wo zamane wo ThaT-baT gae

kaun tolega tujh ko phulon mein

wo taraazu gai wo baT gae

hum se achchhe rahe hamare buzurg

zindagi sadgi se kaT gae

ab raha kya hai in kitabon mein

kaam ki baaten log chaT gae

phir kahin bhi ye ji laga hi nahin

hum to jaane ko ghaT ghaT gae

pyas apni bujha ke pagal log

sab kuen raste ke paT gae

jaane kis ke hisab mein 'alam'

raaten bojhal to din sapaT gae