saba mein tha na dil-awezi-e-bahaar mein tha

sabā meñ thā na dil-āvezī-e-bahār meñ thā

vo ik ishāra ki is chashm-e-vaz.a-dār meñ thā

guzar kuchh aur bhī āhista ai nigār-e-visāl

ki ek umr se maiñ tere intizār meñ thā

havā-e-dahr kī zad meñ bhī aa ke bujh na sakī

balā kā hausla ik sham-e-rahguzār meñ thā

ham apnī dhun meñ chale aa.e jānib-e-manzil

palaT ke dekhā to ik kārvāñ ġhubār meñ thā

milā to phuul khil uTThe the shāḳh-e-mizhgāñ par

judā huā to lahū chashm-e-ashk-bār meñ thā

tujhe pukār ke chup ho ga.e haiñ dīvāne

bas ek nāra-e-mastāna iḳhtiyār meñ thā

ab ik kiran bhī nahīñ nīm-vā darīche meñ

ḳhushā vo din ki koī mere intizār meñ thā

havā-e-kam-nigahī ne bujhā diyā varna

meñ vo charāġh ki raushan harīm-e-yār meñ thā

tirī nigāh se ojhal sahī magar 'mohsin'

ḳhizāñ kā aks bhī ā.īna-e-bahār meñ thā

saba mein tha na dil-awezi-e-bahaar mein tha

wo ek ishaara ki is chashm-e-waza-dar mein tha

guzar kuchh aur bhi aahista ai nigar-e-visal

ki ek umr se main tere intizar mein tha

hawa-e-dahr ki zad mein bhi aa ke bujh na saki

bala ka hausla ek sham-e-rahguzar mein tha

hum apni dhun mein chale aae jaanib-e-manzil

palaT ke dekha to ek karwan ghubar mein tha

mila to phul khil uTThe the shaKH-e-mizhgan par

juda hua to lahu chashm-e-ashk-bar mein tha

tujhe pukar ke chup ho gae hain diwane

bas ek nara-e-mastana iKHtiyar mein tha

ab ek kiran bhi nahin nim-wa dariche mein

KHusha wo din ki koi mere intizar mein tha

hawa-e-kam-nigahi ne bujha diya warna

mein wo charagh ki raushan harim-e-yar mein tha

teri nigah se ojhal sahi magar 'mohsin'

KHizan ka aks bhi aaina-e-bahaar mein tha