sabab uski pareshani ka main hun

sabab us kī pareshānī kā maiñ huuñ

namak kī fasl vo paanī kā maiñ huuñ

ye jangal mujh ko raas aanā nahīñ hai

parinda dasht-e-imkānī kā maiñ huuñ

mirī mushkil mirī mushkil nahīñ hai

vasīla terī āsānī kā maiñ huuñ

mujhe duniyā luTā degī koī din

asāsa ālam-e-fānī kā maiñ huuñ

abhī sāhil mirā rasta na dekhe

abhī dariyā kī tuġhyānī kā maiñ huuñ

vahīñ mujh ko supurd-e-ḳhāk karnā

ki jis ḳhāk-e-bayābānī kā maiñ huuñ

mire hone kā kuchh matlab to hogā

to kyā bekār be-ma.anī kā maiñ huuñ

faqīrāna tabī'at kā huuñ varna

'talab' haqdār sultānī kā maiñ huuñ

sabab us ki pareshani ka main hun

namak ki fasl wo pani ka main hun

ye jangal mujh ko ras aana nahin hai

parinda dasht-e-imkani ka main hun

meri mushkil meri mushkil nahin hai

wasila teri aasani ka main hun

mujhe duniya luTa degi koi din

asasa aalam-e-fani ka main hun

abhi sahil mera rasta na dekhe

abhi dariya ki tughyani ka main hun

wahin mujh ko supurd-e-KHak karna

ki jis KHak-e-bayabani ka main hun

mere hone ka kuchh matlab to hoga

to kya bekar be-mani ka main hun

faqirana tabi'at ka hun warna

'talab' haqdar sultani ka main hun