sabaq aisa paDha diya tu ne

sabaq aisā paḌhā diyā tū ne

dil se sab kuchh bhulā diyā tū ne

ham nikamme hue zamāne ke

kaam aisā sikhā diyā tū ne

kuchh ta'alluq rahā na duniyā se

shaġhl aisā batā diyā tū ne

kis ḳhushī kī ḳhabar sunā ke mujhe

ġham kā putlā banā diyā tū ne

kyā batā.ūñ ki kyā liyā maiñ ne

kyā kahūñ maiñ ki kyā diyā tū ne

be-talab jo milā milā mujh ko

be-ġharaz jo diyā diyā tū ne

umr-e-jāved ḳhizr ko baḳhshī

āb-e-haivāñ pilā diyā tū ne

nār-e-namrūd ko kiyā gulzār

dost ko yuuñ bachā diyā tū ne

dast-e-mūsā meñ faiz baḳhshish hai

nūr-o-lauh-o-asā diyā tū ne

sub.h mauj-e-nasīm-e-gulshan ko

nafas-e-jāñ-fazā diyā tū ne

shab-e-tīra meñ sham-e-raushan ko

nuur ḳhurshīd kā diyā tū ne

naġhma bulbul ko rañg-o-bū gul ko

dil-kash-o-ḳhushnumā diyā tū ne

kahīñ mushtāq se hijāb huā

kahīñ parda uThā diyā tū ne

thā mirā muñh na qābil-e-labbaik

kā'ba mujh ko dikhā diyā tū ne

jis qadar maiñ ne tujh se ḳhvāhish kī

us se mujh ko sivā diyā tū ne

rahbar-e-ḳhizr-o-hādī-e-ilyās

mujh ko vo rahnumā diyā tū ne

miT ga.e dil se naqsh-e-bātil sab

naqsha apnā jamā diyā tū ne

hai yahī rāh-e-manzil-e-maqsūd

ḳhuub raste lagā diyā tū ne

mujh gunahgār ko jo baḳhsh diyā

to jahannum ko kyā diyā tū ne

'dāġh' ko kaun dene vaalā thā

jo diyā ai ḳhudā diyā tū ne

sabaq aisa paDha diya tu ne

dil se sab kuchh bhula diya tu ne

hum nikamme hue zamane ke

kaam aisa sikha diya tu ne

kuchh ta'alluq raha na duniya se

shaghl aisa bata diya tu ne

kis KHushi ki KHabar suna ke mujhe

gham ka putla bana diya tu ne

kya bataun ki kya liya main ne

kya kahun main ki kya diya tu ne

be-talab jo mila mila mujh ko

be-gharaz jo diya diya tu ne

umr-e-jawed KHizr ko baKHshi

aab-e-haiwan pila diya tu ne

nar-e-namrud ko kiya gulzar

dost ko yun bacha diya tu ne

dast-e-musa mein faiz baKHshish hai

nur-o-lauh-o-asa diya tu ne

subh mauj-e-nasim-e-gulshan ko

nafas-e-jaan-faza diya tu ne

shab-e-tira mein sham-e-raushan ko

nur KHurshid ka diya tu ne

naghma bulbul ko rang-o-bu gul ko

dil-kash-o-KHushnuma diya tu ne

kahin mushtaq se hijab hua

kahin parda uTha diya tu ne

tha mera munh na qabil-e-labbaik

ka'ba mujh ko dikha diya tu ne

jis qadar main ne tujh se KHwahish ki

us se mujh ko siwa diya tu ne

rahbar-e-KHizr-o-hadi-e-ilyas

mujh ko wo rahnuma diya tu ne

miT gae dil se naqsh-e-baatil sab

naqsha apna jama diya tu ne

hai yahi rah-e-manzil-e-maqsud

KHub raste laga diya tu ne

mujh gunahgar ko jo baKHsh diya

to jahannum ko kya diya tu ne

'dagh' ko kaun dene wala tha

jo diya ai KHuda diya tu ne