sabr se TuTa hua zabt se haara hua main

sabr se TuuTā huā zabt se haarā huā maiñ

jitnā baaqī bachā huuñ utnā tumhārā huā maiñ

phuul khilte ga.e bantā gayā tan guldasta

dekhte dekhte zaḳhmoñ se nazāra huā maiñ

umr-bhar duniyā ke īñdhan meñ pakāyā gayā huuñ

aap ke chaak se nā-puḳhta utārā huā maiñ

ab zamīñ-zād mujhe dekh ke rah dekhte haiñ

ūñchā uḌtā gayā itnā ki sitārā huā maiñ

chunne vāloñ kā bhalā ho jo mujhe DhūñD ke laa.e

TukḌe-TukḌe ko milā kar hī to saarā huā maiñ

zindagī ek juārī kā guzārā huā pal

aur us pal ke shabistān meñ haarā huā maiñ

jab mire dil kā machaltā huā armāñ hue aap

aap kī jumbish-e-abrū kā ishāra huā maiñ

aap ko dekh ke kāfir huā thā shūmī-e-baḳht

aap se mil ke musalmān dobāra huā maiñ

ab kisī lauh-e-lahad kī tarah miTtā huā naqsh

aur phir hashr meñ ik naam pukārā huā maiñ

apnī derīna rivāyāt kā saudā kar ke

apne ajdād kī daulat kā ḳhasāra huā maiñ

sālhā-sāl nigāhoñ ke chalan sīkhe haiñ

ab kahīñ jā ke zamāne ko gavārā huā maiñ

sabr se TuTa hua zabt se haara hua main

jitna baqi bacha hun utna tumhaara hua main

phul khilte gae banta gaya tan guldasta

dekhte dekhte zaKHmon se nazara hua main

umr-bhar duniya ke indhan mein pakaya gaya hun

aap ke chaak se na-puKHta utara hua main

ab zamin-zad mujhe dekh ke rah dekhte hain

uncha uDta gaya itna ki sitara hua main

chunne walon ka bhala ho jo mujhe DhunD ke lae

TukDe-TukDe ko mila kar hi to sara hua main

zindagi ek juari ka guzara hua pal

aur us pal ke shabistan mein haara hua main

jab mere dil ka machalta hua arman hue aap

aap ki jumbish-e-abru ka ishaara hua main

aap ko dekh ke kafir hua tha shumi-e-baKHt

aap se mil ke musalman dobara hua main

ab kisi lauh-e-lahad ki tarah miTta hua naqsh

aur phir hashr mein ek nam pukara hua main

apni derina riwayat ka sauda kar ke

apne ajdad ki daulat ka KHasara hua main

salha-sal nigahon ke chalan sikhe hain

ab kahin ja ke zamane ko gawara hua main