sada-e-muzhda-e-la-taqnatu ke dhaare par

sadā-e-muzhda-e-lā-taqnatū ke dhāre par

charāġh jalte rahe aas ke manāre par

ajiib ism thā lab par ki paañv uThte hī

maiñ ḳhud ko dekhtā thā arsh ke kināre par

ajiib 'umr thī sadiyoñ se rehn rakkhī huī

ajiib saañs thī chaltī thī bas ishāre par

vo ek aañkh kisī ḳhvāb kī tamannā meñ

vo ek ḳhvāb ki rakkhā huā sharāre par

isī zamīn kī jānib palaT ke aanā thā

utar bhī jaate agar ham kisī sitāre par

matā-e-harf kahīñ be-asar nahīñ 'shahbāz'

ye kā.enāt bhī hai kun ke isti'āre par

sada-e-muzhda-e-la-taqnatu ke dhaare par

charagh jalte rahe aas ke manare par

ajib ism tha lab par ki panw uThte hi

main KHud ko dekhta tha arsh ke kinare par

ajib 'umr thi sadiyon se rehn rakkhi hui

ajib sans thi chalti thi bas ishaare par

wo ek aankh kisi KHwab ki tamanna mein

wo ek KHwab ki rakkha hua sharare par

isi zamin ki jaanib palaT ke aana tha

utar bhi jate agar hum kisi sitare par

mata-e-harf kahin be-asar nahin 'shahbaz'

ye kaenat bhi hai kun ke isti'are par