sadma har-chand tere jaur se jaan par aaya

sadma har-chand tire jaur se jaañ par aayā

tis pe shikva na kabhī merī zabāñ par aayā

rāst-keshoñ kī tuf-e-āh se Dar ai sarkash

tiir phirtā nahīñ jis vaqt nishāñ par aayā

mausam-e-sheb meñ be-fā.eda hai la.ab-e-shabāb

kab samar deve hai jo naḳhl ḳhizāñ par aayā

dil-e-pur-ḳhūñ ko mire ġhuncha-e-tasvīr kī tarah

lab-e-vāshud na kabhī rāz-e-nihāñ par aayā

chashm-e-anjum pe nahīñ abr se vo roz-e-siyāh

jo mire dīda-e-ḳhūñ-nāb-chakāñ par aayā

raat ko dekh ke ai maah tujhe ġhair ke saath

ta.ana-zan dil kā mire gul ke katāñ par aayā

ho ke ustād dabistān-e-suḳhan meñ 'saudā'

sher ke qā.eda dānān-e-jahāñ par aayā

sadma har-chand tere jaur se jaan par aaya

tis pe shikwa na kabhi meri zaban par aaya

rast-keshon ki tuf-e-ah se Dar ai sarkash

tir phirta nahin jis waqt nishan par aaya

mausam-e-sheb mein be-faeda hai lab-e-shabab

kab samar dewe hai jo naKHl KHizan par aaya

dil-e-pur-KHun ko mere ghuncha-e-taswir ki tarah

lab-e-washud na kabhi raaz-e-nihan par aaya

chashm-e-anjum pe nahin abr se wo roz-e-siyah

jo mere dida-e-KHun-nab-chakan par aaya

raat ko dekh ke ai mah tujhe ghair ke sath

tana-zan dil ka mere gul ke katan par aaya

ho ke ustad dabistan-e-suKHan mein 'sauda'

sher ke qaeda danan-e-jahan par aaya