safar aasan hai lekin use dushwar karte hain

safar āsān hai lekin use dushvār karte haiñ

dar-o-dīvār ghar ke yaad ham sau baar karte haiñ

inhīñ tārīk rātoñ se nikal aa.egā ik sūraj

añdheroñ ke safīne par shab-e-ġham paar karte haiñ

samundar ke kināre par Thaharte haiñ gharauñde kab

ajab kār-e-junūñ hai aap ye be-kār karte haiñ

bulā lete haiñ tārīkī vo apne ghar ke āñgan meñ

ujāle kyuuñ magar saare pas-e-dīvār karte haiñ

chhupā rahtā hai dast-e-ārzū ḳhuddār logoñ kā

baḌī mushkil se apnī zaat kā iz.hār karte haiñ

hameñ sākit nahīñ rahnā muāfiq haiñ havāoñ ke

hamārī ḳhaak uḌtī hai ye ham iqrār karte haiñ

thakan uThne nahīñ detī kisī nākām hasrat kī

savere ḳhvāb hī tere mujhe bedār karte haiñ

ḳhamoshī bhī to paiġhām-e-tamannā-e-dil-o-jāñ hai

zabāñ jin kī nahīñ hotī vahī takrār karte haiñ

zamāna tere hāthoñ par kare bai.at ye mumkin hai

yazīd-e-vaqt ham terā magar inkār karte haiñ

safar aasan hai lekin use dushwar karte hain

dar-o-diwar ghar ke yaad hum sau bar karte hain

inhin tarik raaton se nikal aaega ek suraj

andheron ke safine par shab-e-gham par karte hain

samundar ke kinare par Thaharte hain gharaunde kab

ajab kar-e-junun hai aap ye be-kar karte hain

bula lete hain tariki wo apne ghar ke aangan mein

ujale kyun magar sare pas-e-diwar karte hain

chhupa rahta hai dast-e-arzu KHuddar logon ka

baDi mushkil se apni zat ka izhaar karte hain

hamein sakit nahin rahna muafiq hain hawaon ke

hamari KHak uDti hai ye hum iqrar karte hain

thakan uThne nahin deti kisi nakaam hasrat ki

sawere KHwab hi tere mujhe bedar karte hain

KHamoshi bhi to paigham-e-tamanna-e-dil-o-jaan hai

zaban jin ki nahin hoti wahi takrar karte hain

zamana tere hathon par kare baiat ye mumkin hai

yazid-e-waqt hum tera magar inkar karte hain