safar tha thoDa magar kitne moD aae the

safar thā thoḌā magar kitne moḌ aa.e the

ka.ī kahāniyāñ ham in meñ chhoḌ aa.e the

maiñ un parindoñ ko rotā huuñ jo falak ke liye

zamīñ se apnā ta'alluq hī toḌ aa.e the

savāl sūkhe hue āñsuon kā uljhā rahā

hisāb vaise to ham saarā joḌ aa.e the

koī malāl hameñ ab rulā nahīñ saktā

ham ek dard pe āñkheñ nichoḌ aa.e the

ġhubār chhā gayā har chiiz par to hairat kyā

darīche bhī to khule ham hī chhoḌ aa.e the

safar tha thoDa magar kitne moD aae the

kai kahaniyan hum in mein chhoD aae the

main un parindon ko rota hun jo falak ke liye

zamin se apna ta'alluq hi toD aae the

sawal sukhe hue aansuon ka uljha raha

hisab waise to hum sara joD aae the

koi malal hamein ab rula nahin sakta

hum ek dard pe aankhen nichoD aae the

ghubar chha gaya har chiz par to hairat kya

dariche bhi to khule hum hi chhoD aae the