sahar ne andhi gali ki taraf nahin dekha

sahar ne andhī galī kī taraf nahīñ dekhā

jise talab thī usī kī taraf nahīñ dekhā

qalaq thā sab ko samundar kī be-qarārī kā

kisī ne muḌ ke nadī kī taraf nahīñ dekhā

kachoke detī rahīñ ġhurbateñ mujhe lekin

mirī anā ne kisī kī taraf nahīñ dekhā

safar ke biich ye kaisā badal gayā mausam

ki phir kisī ne kisī kī taraf nahīñ dekhā

tamām 'umr guzārī ḳhayāl meñ jis ke

tamām 'umr usī kī taraf nahīñ dekhā

yazīdiyat kā añdherā thā saare kuufe meñ

kisī ne sibt-e-nabī kī taraf nahīñ dekhā

jo aa.ine se milā aa.ine pe jhunjhlāyā

kisī ne apnī kamī kī taraf nahīñ dekhā

mizāj-e-īd bhī samjhā tujhe bhī pahchānā

bas ek apne hī jī kī taraf nahīñ dekhā

sahar ne andhi gali ki taraf nahin dekha

jise talab thi usi ki taraf nahin dekha

qalaq tha sab ko samundar ki be-qarari ka

kisi ne muD ke nadi ki taraf nahin dekha

kachoke deti rahin ghurbaten mujhe lekin

meri ana ne kisi ki taraf nahin dekha

safar ke bich ye kaisa badal gaya mausam

ki phir kisi ne kisi ki taraf nahin dekha

tamam 'umr guzari KHayal mein jis ke

tamam 'umr usi ki taraf nahin dekha

yazidiyat ka andhera tha sare kufe mein

kisi ne sibt-e-nabi ki taraf nahin dekha

jo aaine se mila aaine pe jhunjhlaya

kisi ne apni kami ki taraf nahin dekha

mizaj-e-id bhi samjha tujhe bhi pahchana

bas ek apne hi ji ki taraf nahin dekha