sahar qarib hai KHalwat mahak rahi hogi

sahar qarīb hai ḳhalvat mahak rahī hogī

sharāb sāġhar-e-ġham se chhalak rahī hogī

vo baat tark-e-ta.alluq kā jo sabab Thahrī

vo baat tark-e-ta.alluq kā jo sabab Thahrī

vo baat ḳhud tire dil meñ khaTak rahī hogī

ye ujlī shaam mahakte hue ye sannāTe

vo apne muñh ko dupaTTe se Dhak rahī hogī

maiñ sub.h-o-shām guzartā thā jis se be-maqsad

vo raah ab bhī mirī raah tak rahī hogī

qalam hai sadiyoñ se masrūf husn-kārī meñ

sahar meñ terī adā bhī jhalak rahī hogī

ye baat alag hai maiñ rāhoñ kī justujū meñ huuñ

mirī talāsh meñ manzil bhaTak rahī hogī

'hayāt' phir mahak uThī hai yaad maazī kī

hamāre gaañv meñ phir fasl pak rahī hogī

sahar qarib hai KHalwat mahak rahi hogi

sharab saghar-e-gham se chhalak rahi hogi

wo baat tark-e-talluq ka jo sabab Thahri

wo baat tark-e-talluq ka jo sabab Thahri

wo baat KHud tere dil mein khaTak rahi hogi

ye ujli sham mahakte hue ye sannaTe

wo apne munh ko dupaTTe se Dhak rahi hogi

main subh-o-sham guzarta tha jis se be-maqsad

wo rah ab bhi meri rah tak rahi hogi

qalam hai sadiyon se masruf husn-kari mein

sahar mein teri ada bhi jhalak rahi hogi

ye baat alag hai main rahon ki justuju mein hun

meri talash mein manzil bhaTak rahi hogi

'hayat' phir mahak uThi hai yaad mazi ki

hamare ganw mein phir fasl pak rahi hogi