sahraon ke dost the hum KHud-arai se KHatm hue

sahrāoñ ke dost the ham ḳhud-ārā.ī se ḳhatm hue

uupar uupar ḳhaak uḌaa.ī gahrā.ī se ḳhatm hue

vīrāna bhī ham the ḳhāmoshī bhī ham the dil bhī ham

yaksūī se ishq kiyā aur yaktā.ī se ḳhatm hue

dariyā daldal parbat jañgal andar tak aa pahuñche the

isī bastī ke rahne vaale tanhā.ī se ḳhatm hue

kitnī āñkheñ thiiñ jo apnī bīnā.ī meñ Duub ga.iiñ

kitne manzar the jo apnī pahnā.ī se ḳhatm hue

'ādil' is rahdārī se vābasta kuchh gul-daste the

ruk ruk kar baḌhne vāloñ kī paspā.ī se ḳhatm hue

sahraon ke dost the hum KHud-arai se KHatm hue

upar upar KHak uDai gahrai se KHatm hue

virana bhi hum the KHamoshi bhi hum the dil bhi hum

yaksui se ishq kiya aur yaktai se KHatm hue

dariya daldal parbat jangal andar tak aa pahunche the

isi basti ke rahne wale tanhai se KHatm hue

kitni aankhen thin jo apni binai mein Dub gain

kitne manzar the jo apni pahnai se KHatm hue

'adil' is rahdari se wabasta kuchh gul-daste the

ruk ruk kar baDhne walon ki paspai se KHatm hue