sajde tere kahne se main kar lun bhi to kya ho

sajde tire kahne se maiñ kar luuñ bhī to kyā ho

tū ai but-e-kāfir na ḳhudā hai na ḳhudā ho

ġhunche ke chaTakne pe na gulshan meñ ḳhafā ho

mumkin hai kisī TuuTe hue dil kī sadā ho

khā us kī qasam jo na tujhe dekh chukā ho

tere to farishtoñ se bhī va.ada na vafā ho

insāñ kisī fitrat pe to qaa.em ho kam-az-kam

achchhā ho to achchhā ho burā ho to burā ho

is hashr meñ kuchh daad na fariyād kisī kī

jo hashr ki zālim tire kūche se uThā ho

itrā ke ye raftār-e-javānī nahīñ achchhī

chaal aisī chalā karte haiñ jaisī ki havā ho

mai-ḳhāne meñ jab ham se faqīroñ ko na pūchhā

ye kahte hue chal diye saaqī kā bhalā ho

allāh-re o dushman-e-iz.hār-e-mohabbat

vo dard diyā hai jo kisī se na davā ho

tanhā vo mirī qabr pe haiñ chāk-garebāñ

jaise kisī sahrā meñ koī phuul khilā ho

mansūr se kahtī hai yahī dār-e-mohabbat

us kī ye sazā hai jo gunahgār-e-vafā ho

jab lutf ho allāh sitam vāloñ se pūchhe

tū yaas kī nazroñ se mujhe dekh rahā ho

farmāte haiñ vo sun ke shab-e-ġham kī shikāyat

kis ne ye kahā thā ki 'qamar' tum hameñ chāho

sajde tere kahne se main kar lun bhi to kya ho

tu ai but-e-kafir na KHuda hai na KHuda ho

ghunche ke chaTakne pe na gulshan mein KHafa ho

mumkin hai kisi TuTe hue dil ki sada ho

kha us ki qasam jo na tujhe dekh chuka ho

tere to farishton se bhi wada na wafa ho

insan kisi fitrat pe to qaem ho kam-az-kam

achchha ho to achchha ho bura ho to bura ho

is hashr mein kuchh dad na fariyaad kisi ki

jo hashr ki zalim tere kuche se uTha ho

itra ke ye raftar-e-jawani nahin achchhi

chaal aisi chala karte hain jaisi ki hawa ho

mai-KHane mein jab hum se faqiron ko na puchha

ye kahte hue chal diye saqi ka bhala ho

allah-re o dushman-e-izhaar-e-mohabbat

wo dard diya hai jo kisi se na dawa ho

tanha wo meri qabr pe hain chaak-gareban

jaise kisi sahra mein koi phul khila ho

mansur se kahti hai yahi dar-e-mohabbat

us ki ye saza hai jo gunahgar-e-wafa ho

jab lutf ho allah sitam walon se puchhe

tu yas ki nazron se mujhe dekh raha ho

farmate hain wo sun ke shab-e-gham ki shikayat

kis ne ye kaha tha ki 'qamar' tum hamein chaho