sajdon ki rasm-e-kohan ko hosh ganwa ke bhul ja

sajdoñ kī rasm-e-kohan ko hosh gañvā ke bhuul jā

sañg-e-dar-e-habīb par sar ko jhukā ke bhuul jā

ishq ko barqarār rakh dil ko lagā ke bhuul jā

is se bhī mutma.in na ho us ko bhī pā ke bhuul jā

dil se taḌap judā na kar saaz ko be-sadā na kar

dard jo ho fuġhāñ talab hoñTh hilā ke bhuul jā

dard uThe uThā kare choT lage lagā kare

kuchh bhī ho tū ba-nām-e-dost hañs ke hañsā ke bhuul jā

jām-ba-dast-o-mai-ba-jām yuuñ hī guzār sub.h-o-shām

ziist kī talḳhiyāñ mudām pī ke pilā ke bhuul jā

manzil-e-ishq se guzar be-ḳhud-o-mast-o-be-ḳhabar

choT lage to uf na kar dil ko dabā ke bhuul jā

guzre hue zamāne ko yaad na kar kabhī 'ḳhumār'

aur jo yaad aa hī jaa.e ashk bahā ke bhuul jā

sajdon ki rasm-e-kohan ko hosh ganwa ke bhul ja

sang-e-dar-e-habib par sar ko jhuka ke bhul ja

ishq ko barqarar rakh dil ko laga ke bhul ja

is se bhi mutmain na ho us ko bhi pa ke bhul ja

dil se taDap juda na kar saz ko be-sada na kar

dard jo ho fughan talab honTh hila ke bhul ja

dard uThe uTha kare choT lage laga kare

kuchh bhi ho tu ba-nam-e-dost hans ke hansa ke bhul ja

jam-ba-dast-o-mai-ba-jam yun hi guzar subh-o-sham

zist ki talKHiyan mudam pi ke pila ke bhul ja

manzil-e-ishq se guzar be-KHud-o-mast-o-be-KHabar

choT lage to uf na kar dil ko daba ke bhul ja

guzre hue zamane ko yaad na kar kabhi 'KHumar'

aur jo yaad aa hi jae ashk baha ke bhul ja