sama sakta nahin pahna-e-fitrat mein mera sauda

samā saktā nahīñ pahnā-e-fitrat meñ mirā saudā

ġhalat thā ai junūñ shāyad tirā andāza-e-sahrā

ḳhudī se is tilism-e-rañg-o-bū ko toḌ sakte haiñ

yahī tauhīd thī jis ko na tū samjhā na maiñ samjhā

nigah paidā kar ai ġhāfil tajallī ain-e-fitrat hai

ki apnī mauj se begāna rah saktā nahīñ dariyā

raqābat 'ilm o 'irfāñ meñ ġhalat-bīnī hai mimbar kī

ki vo hallāj kī suulī ko samjhā hai raqīb apnā

ḳhudā ke paak bandoñ ko hukūmat meñ ġhulāmī meñ

zirah koī agar mahfūz rakhtī hai to istiġhnā

na kar taqlīd ai jibrīl mere jazb-o-mastī kī

tan-āsāñ arshiyoñ ko zikr o tasbīh o tavāf aulā

bahut dekhe haiñ maiñ ne mashriq o maġhrib ke mai-ḳhāne

yahāñ saaqī nahīñ paidā vahāñ be-zauq hai sahbā

na īrāñ meñ rahe baaqī na tūrāñ meñ rahe baaqī

vo bande faqr thā jin kā halāk-e-qaisar-o-kisrā

yahī shaiḳh-e-haram hai jo churā kar bech khātā hai

galīm-e-būzar o dalq-e-uves o chādar-e-zahrā

huzūr-e-haq meñ isrāfīl ne merī shikāyat kī

ye banda vaqt se pahle qayāmat kar na de barpā

nidā aa.ī ki āshob-e-qayāmat se ye kyā kam hai

girafta chīniyāñ ehrām o makkī ḳhufta dar bat.hā

labālab shīsha-e-tahzīb-e-hāzir hai mai-e-lā se

magar saaqī ke hāthoñ meñ nahīñ paimāna-e-illā

dabā rakkhā hai is ko zaḳhma-var kī tez-dastī ne

bahut nīche suroñ meñ hai abhī europe kā vāvailā

isī dariyā se uThtī hai vo mauj-e-tund-jaulāñ bhī

nahangoñ ke nasheman jis se hote haiñ tah-o-bālā

ġhulāmī kyā hai zauq-e-husn-o-zebā.ī se mahrūmī

jise zebā kaheñ āzād bande hai vahī zebā

bharosā kar nahīñ sakte ġhulāmoñ kī basīrat par

ki duniyā meñ faqat mardān-e-hur kī aañkh hai biinā

vahī hai sāhib-e-imroz jis ne apnī himmat se

zamāne ke samundar se nikālā gauhar-e-fardā

farañgī shīshagar ke fan se patthar ho ga.e paanī

mirī iksīr ne shīshe ko baḳhshī saḳhtī-e-ḳhārā

rahe haiñ aur haiñ fir.aun merī ghaat meñ ab tak

magar kyā ġham ki merī āstīñ meñ hai yad-e-baizā

vo chingārī ḳhas-o-ḳhāshāk se kis tarah dab jaa.e

jise haq ne kiyā ho nīstāñ ke vāste paidā

mohabbat ḳheshtan biinī mohabbat ḳheshtan daarī

mohabbat āstān-e-qaisar-o-kisrā se be-parvā

'ajab kyā gar mah o parvīñ mire naḳhchīr ho jaa.eñ

ki bar fitrāk-e-sāhib daulat-e-bastam sar-e-ḳhud rā

vo dāna-e-subul ḳhatmur-rusul maulā-e-kul jis ne

ġhubār-e-rāh ko baḳhshā faroġh-e-vādī-e-sīnā

nigāh-e-ishq o mastī meñ vahī avval vahī āḳhir

vahī qur.āñ vahī furqāñ vahī yāsīñ vahī taahā

'sanā.ī' ke adab se maiñ ne ġhavvāsī na kī varna

abhī is bahr meñ baaqī haiñ lākhoñ lūlu-e-lālā

sama sakta nahin pahna-e-fitrat mein mera sauda

ghalat tha ai junun shayad tera andaza-e-sahra

KHudi se is tilism-e-rang-o-bu ko toD sakte hain

yahi tauhid thi jis ko na tu samjha na main samjha

nigah paida kar ai ghafil tajalli ain-e-fitrat hai

ki apni mauj se begana rah sakta nahin dariya

raqabat 'ilm o 'irfan mein ghalat-bini hai mimbar ki

ki wo hallaj ki suli ko samjha hai raqib apna

KHuda ke pak bandon ko hukumat mein ghulami mein

zirah koi agar mahfuz rakhti hai to istighna

na kar taqlid ai jibril mere jazb-o-masti ki

tan-asan arshiyon ko zikr o tasbih o tawaf aula

bahut dekhe hain main ne mashriq o maghrib ke mai-KHane

yahan saqi nahin paida wahan be-zauq hai sahba

na iran mein rahe baqi na turan mein rahe baqi

wo bande faqr tha jin ka halak-e-qaisar-o-kisra

yahi shaiKH-e-haram hai jo chura kar bech khata hai

galim-e-buzar o dalq-e-uwes o chadar-e-zahra

huzur-e-haq mein israfil ne meri shikayat ki

ye banda waqt se pahle qayamat kar na de barpa

nida aai ki aashob-e-qayamat se ye kya kam hai

girafta chiniyan ehram o makki KHufta dar batha

labaalab shisha-e-tahzib-e-hazir hai mai-e-la se

magar saqi ke hathon mein nahin paimana-e-illa

daba rakkha hai is ko zaKHma-war ki tez-dasti ne

bahut niche suron mein hai abhi europe ka wawaila

isi dariya se uThti hai wo mauj-e-tund-jaulan bhi

nahangon ke nasheman jis se hote hain tah-o-baala

ghulami kya hai zauq-e-husn-o-zebai se mahrumi

jise zeba kahen aazad bande hai wahi zeba

bharosa kar nahin sakte ghulamon ki basirat par

ki duniya mein faqat mardan-e-hur ki aankh hai bina

wahi hai sahib-e-imroz jis ne apni himmat se

zamane ke samundar se nikala gauhar-e-farda

farangi shishagar ke fan se patthar ho gae pani

meri iksir ne shishe ko baKHshi saKHti-e-KHara

rahe hain aur hain firaun meri ghat mein ab tak

magar kya gham ki meri aastin mein hai yad-e-baiza

wo chingari KHas-o-KHashak se kis tarah dab jae

jise haq ne kiya ho nistan ke waste paida

mohabbat KHeshtan bini mohabbat KHeshtan dari

mohabbat aastan-e-qaisar-o-kisra se be-parwa

'ajab kya gar mah o parwin mere naKHchir ho jaen

ki bar fitrak-e-sahib daulat-e-bastam sar-e-KHud ra

wo dana-e-subul KHatmur-rusul maula-e-kul jis ne

ghubar-e-rah ko baKHsha farogh-e-wadi-e-sina

nigah-e-ishq o masti mein wahi awwal wahi aaKHir

wahi quran wahi furqan wahi yasin wahi taha

'sanai' ke adab se main ne ghawwasi na ki warna

abhi is bahr mein baqi hain lakhon lulu-e-lala