samand-e-KHwab wahan chhoD kar rawana hua

samand-e-ḳhvāb vahāñ chhoḌ kar ravāna huā

jahāñ surāġh-e-safar koī naqsh-e-pā na huā

ajiib aag lagā kar koī ravāna huā

mire makān ko jalte hue zamāna huā

maiñ thā kahāñ kā musavvir ki pūjtī duniyā

bahut huā to mirā ghar nigār-ḳhāna huā

ugaao dard kī fasleñ ki zindagī jaage

lahū kī fasl ugāte hue zamāna huā

maiñ ā.īna huuñ har ik sāhib-e-nazar ke liye

magar ḳhud apne hī chehre se āshnā na huā

bikhar ga.ī thī sar-e-rāh zindagī lekin

qadam ruke to mirā farz tāziyāna huā

samand-e-KHwab wahan chhoD kar rawana hua

jahan suragh-e-safar koi naqsh-e-pa na hua

ajib aag laga kar koi rawana hua

mere makan ko jalte hue zamana hua

main tha kahan ka musawwir ki pujti duniya

bahut hua to mera ghar nigar-KHana hua

ugao dard ki faslen ki zindagi jage

lahu ki fasl ugate hue zamana hua

main aaina hun har ek sahib-e-nazar ke liye

magar KHud apne hi chehre se aashna na hua

bikhar gai thi sar-e-rah zindagi lekin

qadam ruke to mera farz taziyana hua