sanbhal sanbhal ke chaloge to faeda hoga

sañbhal sañbhal ke chaloge to fā.eda hogā

baḌoñ kī baat sunoge to fā.eda hogā

ye pal parinde nahīñ haiñ ki lauT ā.eñge

samay kī qadr karoge to fā.eda hogā

havā kā haath tumheñ rāsta dikhā.egā

havā ke sang chaloge to fā.eda hogā

nazar phir ā.eñgī tum ko ka.ī chhupī chīzeñ

charāġh ban ke jaloge to fā.eda hogā

na.e ḳhayāl meñ dhaḌkan samo ke laayā huuñ

mirā jo sher paḌhoge to fā.eda hogā

ga.e dinoñ ke ka.ī raaz tum pe kholegā

shajar ke paas rahoge to fā.eda hogā

amal kā radd-e-amal har amal pe laagū hai

kisī kā saath bhī doge to fā.eda hogā

sanbhal sanbhal ke chaloge to faeda hoga

baDon ki baat sunoge to faeda hoga

ye pal parinde nahin hain ki lauT aaenge

samay ki qadr karoge to faeda hoga

hawa ka hath tumhein rasta dikhaega

hawa ke sang chaloge to faeda hoga

nazar phir aaengi tum ko kai chhupi chizen

charagh ban ke jaloge to faeda hoga

nae KHayal mein dhaDkan samo ke laya hun

mera jo sher paDhoge to faeda hoga

gae dinon ke kai raaz tum pe kholega

shajar ke pas rahoge to faeda hoga

amal ka radd-e-amal har amal pe lagu hai

kisi ka sath bhi doge to faeda hoga