sang the pighle to pani ho gae

sañg the pighle to paanī ho ga.e

ham vo chehre jo kahānī ho ga.e

khel hai ab har taraf tasvīr kā

lafz saare be-ma.ānī ho ga.e

baat karnī thī hameñ jis se bahut

ham usī kī be-zabānī ho ga.e

chand qatre rah ga.e the aañkh meñ

vo bhī dariyā kī ravānī ho ga.e

sabz mausam aa gayā thā room meñ

aa.ine bhī dhānī dhānī ho ga.e

āsmāñ par rah ke bhī tum ḳhaak ho

ham zamīñ par āsmānī ho ga.e

chhāñv meñ gautam kī kyā baiThe 'shakīl'

thoḌe thoḌe ham bhī gyānī ho ga.e

sang the pighle to pani ho gae

hum wo chehre jo kahani ho gae

khel hai ab har taraf taswir ka

lafz sare be-maani ho gae

baat karni thi hamein jis se bahut

hum usi ki be-zabani ho gae

chand qatre rah gae the aankh mein

wo bhi dariya ki rawani ho gae

sabz mausam aa gaya tha room mein

aaine bhi dhani dhani ho gae

aasman par rah ke bhi tum KHak ho

hum zamin par aasmani ho gae

chhanw mein gautam ki kya baiThe 'shakil'

thoDe thoDe hum bhi gyani ho gae