sar jhukae sar-e-mahshar jo gunahgar aae

sar jhukā.e sar-e-mahshar jo gunahgār aa.e

us ke andāz pe rahmat ko na kyuuñ pyaar aa.e

jām-o-paimāna se mai-ḳhāna se kyā kaam use

ho ke saaqī kī nigāhoñ se jo sarshār aa.e

dī sadā dil ne zarā aur bhī dushvār ho raah

rāste jab bhī mire sāmne hamvār aa.e

zindagī kyuuñ na mire maut pe un kī jo log

muskurāte hue zindāñ se sar-e-dār aa.e

maiñ ne taz.īn-e-chaman ke liye ḳhuuñ apnā diyā

paa.e phuul auroñ ne hisse meñ mire ḳhaar aa.e

bāñkpan apnī tabī.at kā kabhī kam na huā

sāmne apne koī laakh tarah-dār aa.e

aise jāñ-bāzoñ kī ban jaa.e na kyuuñ maut hayāt

muskurāte hue 'āsī' jo sar-e-dār aa.e

sar jhukae sar-e-mahshar jo gunahgar aae

us ke andaz pe rahmat ko na kyun pyar aae

jam-o-paimana se mai-KHana se kya kaam use

ho ke saqi ki nigahon se jo sarshaar aae

di sada dil ne zara aur bhi dushwar ho rah

raste jab bhi mere samne hamwar aae

zindagi kyun na mere maut pe un ki jo log

muskuraate hue zindan se sar-e-dar aae

main ne tazin-e-chaman ke liye KHun apna diya

pae phul auron ne hisse mein mere KHar aae

bankpan apni tabiat ka kabhi kam na hua

samne apne koi lakh tarah-dar aae

aise jaan-bazon ki ban jae na kyun maut hayat

muskuraate hue 'asi' jo sar-e-dar aae