sirf chehra hi nazar aata hai aaine mein

sirf chehra hī nazar aatā hai ā.īne meñ

aks-e-ā.īna nahīñ dikhtā hai ā.īne meñ

silsila yaad kā jab zehn meñ jaag uThtā hai

ek dariyā sā umaD aatā hai ā.īne meñ

apnī āñkhoñ ko kabhī ġhaur se jab dekhtā huuñ

nuur chehra tirā jaag uThtā hai ā.īne meñ

rote rote jau kabhī paḌtī hai us samt nazar

koī namnāk diyā jaltā hai ā.īne meñ

kabhī aisā bhī huā hai ki shab-e-furqat meñ

aks ubhar kar tirā kho jaatā hai ā.īne meñ

taire chehre kī hañsī dekh ke yuuñ lagtā hai

phuul jaise koī khil uThtā hai ā.īne meñ

kyā ḳhabar kaisā lage aks jo bāhar aa jaa.e

us ko rahne do vahīñ achchhā hai ā.īne meñ

us meñ jo Duubā kabhī vo na ubharne paayā

maujzan ek siyah dariyā hai ā.īne meñ

ā.īna-ḳhāna meñ kyā ham se chhupā hai 'māmūn'

ham ne kyā kyā na bhalā dekhā hai ā.īne meñ

sirf chehra hi nazar aata hai aaine mein

aks-e-aina nahin dikhta hai aaine mein

silsila yaad ka jab zehn mein jag uThta hai

ek dariya sa umaD aata hai aaine mein

apni aankhon ko kabhi ghaur se jab dekhta hun

nur chehra tera jag uThta hai aaine mein

rote rote jau kabhi paDti hai us samt nazar

koi namnak diya jalta hai aaine mein

kabhi aisa bhi hua hai ki shab-e-furqat mein

aks ubhar kar tera kho jata hai aaine mein

taire chehre ki hansi dekh ke yun lagta hai

phul jaise koi khil uThta hai aaine mein

kya KHabar kaisa lage aks jo bahar aa jae

us ko rahne do wahin achchha hai aaine mein

us mein jo Duba kabhi wo na ubharne paya

maujzan ek siyah dariya hai aaine mein

aaina-KHana mein kya hum se chhupa hai 'mamun'

hum ne kya kya na bhala dekha hai aaine mein