sarsabz hai jo mausam-e-gul mein chaman tamam

sarsabz hai jo mausam-e-gul meñ chaman tamām

apnā bhī chāk-chāk huā pairahan tamām

hastī meñ bhī to bhūlā na ahl-e-adam ko maiñ

ġhurbat meñ yaad aa.e mujhe ham-vatan tamām

ḳhush-e'tiqād ho ga.e us but ko dekh kar

zunnār toḌ Dāleñge ab barhaman tamām

hastī meñ jo adam se na aa.e vo ḳhuub hai

jo aa.egā uThā.egā ranj-o-mehan tamām

maiñ bad-nasīb shūmī-e-qismat se rah gayā

pahuñchā huuñ kab jab uTh ga.ī vo anjuman tamām

ārā.ish-e-jamāl kī kamsin ko kyā tamīz

uljhī hai us kī zulf-e-shikan-dar-shikan tamām

shāyad chaman meñ āmad-e-fasl-e-bahār hai

phir ho ga.e hare mire zaḳhm-e-kuhan tamām

soz-e-darūñ ke zabt kā yaarā nahīñ rahā

māmūr ābloñ se hai apnā dahan tamām

derīna ḳhum agar hai to hai āsmān-e-pīr

is meñ bharī huī hai sharāb-e-kuhan tamām

gul kyā sivā ho us se kahīñ nāzukī meñ tum

ā.īne se hai saaf tumhārā badan tamām

allāh andalīb huuñ maiñ kis qimāsh kā

gul is chaman ke mujh pe haiñ kyoñ ḳhanda-zan tamām

sad-shukr banda hirs-o-havā kā nahīñ huuñ maiñ

hamrāh le ke jā.ūñgā do gaz kafan tamām

afsos jān-e-shīrīñ kī parvā na kuchh bhī kī

teshe se apnā kaam kiyā kohkan tamām

dīvāne ho ga.e tire vahshī ko dekh kar

jangal meñ apnī chaukḌī bhūle hiran tamām

saudā jo 'sabr' mujh ko hai mizhgān-e-yār kā

nashtar hī ban ga.e haiñ mire mū-e-tan tamām

sarsabz hai jo mausam-e-gul mein chaman tamam

apna bhi chaak-chaak hua pairahan tamam

hasti mein bhi to bhula na ahl-e-adam ko main

ghurbat mein yaad aae mujhe ham-watan tamam

KHush-e'tiqad ho gae us but ko dekh kar

zunnar toD Dalenge ab barhaman tamam

hasti mein jo adam se na aae wo KHub hai

jo aaega uThaega ranj-o-mehan tamam

main bad-nasib shumi-e-qismat se rah gaya

pahuncha hun kab jab uTh gai wo anjuman tamam

aaraish-e-jamal ki kamsin ko kya tamiz

uljhi hai us ki zulf-e-shikan-dar-shikan tamam

shayad chaman mein aamad-e-fasl-e-bahaar hai

phir ho gae hare mere zaKHm-e-kuhan tamam

soz-e-darun ke zabt ka yara nahin raha

mamur aablon se hai apna dahan tamam

derina KHum agar hai to hai aasman-e-pir

is mein bhari hui hai sharab-e-kuhan tamam

gul kya siwa ho us se kahin nazuki mein tum

aaine se hai saf tumhaara badan tamam

allah andalib hun main kis qimash ka

gul is chaman ke mujh pe hain kyon KHanda-zan tamam

sad-shukr banda hirs-o-hawa ka nahin hun main

hamrah le ke jaunga do gaz kafan tamam

afsos jaan-e-shirin ki parwa na kuchh bhi ki

teshe se apna kaam kiya kohkan tamam

diwane ho gae tere wahshi ko dekh kar

jangal mein apni chaukDi bhule hiran tamam

sauda jo 'sabr' mujh ko hai mizhgan-e-yar ka

nashtar hi ban gae hain mere mu-e-tan tamam