satata wo agar fitrat se haT ke

satātā vo agar fitrat se haT ke

to patthar mārtā maiñ bhī palaT ke

jo maiñ ne intizār-e-yār khīñchā

mirā ghar ban ga.ī duniyā simaT ke

bahut kuchh hai nafas kī anjuman meñ

magar maiñ jī rahā huuñ sab se haT ke

maiñ un ḳhāmoshiyoñ meñ rah rahā huuñ

jahāñ aatī haiñ āvāzeñ palaT ke

diye kī lau zarā jo Dagmagā.ī

zamīñ par āsmāñ aayā jhapaT ke

ye sach hai maiñ vahī huuñ tū vahī hai

magar ab saañs le kuchh duur haT ke

guzārā din mashaqqat karte karte

guzārī raat patthar se lipaT ke

tire baare meñ soche jā rahā huuñ

magar ab lag rahe haiñ dil ko jhaTke

satata wo agar fitrat se haT ke

to patthar marta main bhi palaT ke

jo main ne intizar-e-yar khincha

mera ghar ban gai duniya simaT ke

bahut kuchh hai nafas ki anjuman mein

magar main ji raha hun sab se haT ke

main un KHamoshiyon mein rah raha hun

jahan aati hain aawazen palaT ke

diye ki lau zara jo Dagmagai

zamin par aasman aaya jhapaT ke

ye sach hai main wahi hun tu wahi hai

magar ab sans le kuchh dur haT ke

guzara din mashaqqat karte karte

guzari raat patthar se lipaT ke

tere bare mein soche ja raha hun

magar ab lag rahe hain dil ko jhaTke