shahr dar shahr ba-andaz-e-digar raushan hai

shahr dar shahr ba-andāz-e-digar raushan hai

har taraf apnī sadā apnā hunar raushan hai

paañv kī ḳhaak chamaktī hai sar-e-rāhguzar

koī mish.al nahīñ har naqsh-e-safar raushan hai

jis ne sho.aloñ ko sikhāyā hai lapakne kā shu.ūr

raakh ke Dher meñ ab bhī vo sharar raushan hai

khīñch dī kis ne añdhere meñ ujāle kī lakīr

ek ummīd pe har tār-e-nazar raushan hai

qāfile vāloñ ko manzil kā pata yaad nahīñ

hausla hai to har ik rāh-e-safar raushan hai

sub.h se pahle hī bujhne lage ḳhvāboñ ke charāġh

raat ke sahn meñ yādoñ kā khañDar raushan hai

shahr dar shahr ba-andaz-e-digar raushan hai

har taraf apni sada apna hunar raushan hai

panw ki KHak chamakti hai sar-e-rahguzar

koi mishal nahin har naqsh-e-safar raushan hai

jis ne shoalon ko sikhaya hai lapakne ka shuur

rakh ke Dher mein ab bhi wo sharar raushan hai

khinch di kis ne andhere mein ujale ki lakir

ek ummid pe har tar-e-nazar raushan hai

qafile walon ko manzil ka pata yaad nahin

hausla hai to har ek rah-e-safar raushan hai

subh se pahle hi bujhne lage KHwabon ke charagh

raat ke sahn mein yaadon ka khanDar raushan hai