شہر در شہر بہ انداز دگر روشن ہے

شہر در شہر بہ انداز دگر روشن ہے

ہر طرف اپنی صدا اپنا ہنر روشن ہے

پاؤں کی خاک چمکتی ہے سر راہ گزر

کوئی مشعل نہیں ہر نقش سفر روشن ہے

جس نے شعلوں کو سکھایا ہے لپکنے کا شعور

راکھ کے ڈھیر میں اب بھی وہ شرر روشن ہے

کھینچ دی کس نے اندھیرے میں اجالے کی لکیر

ایک امید پہ ہر تار نظر روشن ہے

قافلہ والوں کو منزل کا پتہ یاد نہیں

حوصلہ ہے تو ہر اک راہ سفر روشن ہے

صبح سے پہلے ہی بجھنے لگے خوابوں کے چراغ

رات کے صحن میں یادوں کا کھنڈر روشن ہے