shaikast-e-shauq ko takmil-e-arzu kahiye

shaikast-e-shauq ko takmīl-e-ārzū kahiye

jo tishnagī ho to paimāna-o-subū kahiye

ḳhayāl-e-yār ko dījiye visāl-e-yār kā naam

shab-e-firāq ko gaisu-e-mushk-bū kahiye

charāġh-e-anjuman-e-hairat-e-nazāra the

vo lāla-rū jinheñ ab dāġh-e-ārzū kahiye

mahak rahī hai ġhazal zikr-e-zulf-e-ḳhūbāñ se

nasīm-e-sub.h kī mānind kū-ba-kū kahiye

shikāyateñ bhī bahut haiñ hikāyateñ bhī bahut

mazā to jab hai ki yāroñ ke rū-ba-rū kahiye

ba-hukm kījiye phir ḳhanjaroñ kī dildārī

dahān-e-zaḳhm se afsāna-e-gulū kahiye

shaikast-e-shauq ko takmil-e-arzu kahiye

jo tishnagi ho to paimana-o-subu kahiye

KHayal-e-yar ko dijiye visal-e-yar ka nam

shab-e-firaq ko gaisu-e-mushk-bu kahiye

charagh-e-anjuman-e-hairat-e-nazara the

wo lala-ru jinhen ab dagh-e-arzu kahiye

mahak rahi hai ghazal zikr-e-zulf-e-KHuban se

nasim-e-subh ki manind ku-ba-ku kahiye

shikayaten bhi bahut hain hikayaten bhi bahut

maza to jab hai ki yaron ke ru-ba-ru kahiye

ba-hukm kijiye phir KHanjaron ki dildari

dahan-e-zaKHm se afsana-e-gulu kahiye