shaiKH o barhaman donon hain bar-haq donon ka har kaam munasib

shaiḳh o barhaman donoñ haiñ bar-haq donoñ kā har kaam munāsib

bech leñ fauran dair-o-haram bhī paa.eñ kahīñ gar daam munāsib

merā to har ik fe.al 'abas hai ġhair kā har iqdām munāsib

vāqi'a ye hai piiv jise chāheñ us kā suhāgan naam munāsib

vaqt kā paiham yuuñ hai taqāzā rahbar-e-sad-sāla ko haTā do

jaise purānī chiiz kā aksar hotā hai nīlām munāsib

ḳhauf hai din ko dekhe na duniyā ho na taqaddus aap kā rusvā

qasd hai mai-ḳhāne kā jo vā'iz is ke liye hai shaam munāsib

tere taġhāful ne kiyā zaḳhmī terī adāoñ ne hameñ maarā

chāhne vāloñ ke liye zālim the yahī atom-bām munāsib

tujh ko ḳhabar kyā is kī nahīñ hai sāthī kahāñ se pahuñche kahāñ tak

hosh meñ aa ārām ke bachche ab hai nahīñ ārām munāsib

ye tirī sāda-lauhiyāñ nāseh rañg kisī din lā ke raheñgī

ḳhuub banegī terī hajāmat mil ga.e gar hajjām munāsib

sīm-o-javāhir māh-laqā le apnī harīm-e-nāz sajā le

ḳhuub maze duniyā ke uḌā le haiñ abhī ye ayyām munāsib

baat bhī un se kī na kisī ne aarzū dil kī rah ga.ī dil meñ

ghar meñ hī baiThī rah ga.ī laḌkī aayā na ik paiġhām munāsib

shaiḳh o barhaman se koī kah de ruḳh na kareñ bhūle se udhar kā

ye hai mai-ḳhāna nahīñ is meñ dāḳhila-e-ayyām munāsib

jaur-o-sitam Dhāne meñ jo paiham aayā hai un ke ruḳh pe pasīna

hai mire armānoñ ke nahāne ke liye ye hammām munāsib

baat koī iz.hār-e-haqīqat meñ bhī uThā rakhnā nahīñ zālim

'shauq' kabhī ash'ār meñ jaise hotā nahīñ ilhām munāsib

shaiKH o barhaman donon hain bar-haq donon ka har kaam munasib

bech len fauran dair-o-haram bhi paen kahin gar dam munasib

mera to har ek feal 'abas hai ghair ka har iqdam munasib

waqi'a ye hai piw jise chahen us ka suhagan nam munasib

waqt ka paiham yun hai taqaza rahbar-e-sad-sala ko haTa do

jaise purani chiz ka aksar hota hai nilam munasib

KHauf hai din ko dekhe na duniya ho na taqaddus aap ka ruswa

qasd hai mai-KHane ka jo wa'iz is ke liye hai sham munasib

tere taghaful ne kiya zaKHmi teri adaon ne hamein mara

chahne walon ke liye zalim the yahi atom-baam munasib

tujh ko KHabar kya is ki nahin hai sathi kahan se pahunche kahan tak

hosh mein aa aaram ke bachche ab hai nahin aaram munasib

ye teri sada-lauhiyan naseh rang kisi din la ke rahengi

KHub banegi teri hajamat mil gae gar hajjam munasib

sim-o-jawahir mah-laqa le apni harim-e-naz saja le

KHub maze duniya ke uDa le hain abhi ye ayyam munasib

baat bhi un se ki na kisi ne aarzu dil ki rah gai dil mein

ghar mein hi baiThi rah gai laDki aaya na ek paigham munasib

shaiKH o barhaman se koi kah de ruKH na karen bhule se udhar ka

ye hai mai-KHana nahin is mein daKHila-e-ayyam munasib

jaur-o-sitam Dhane mein jo paiham aaya hai un ke ruKH pe pasina

hai mere armanon ke nahane ke liye ye hammam munasib

baat koi izhaar-e-haqiqat mein bhi uTha rakhna nahin zalim

'shauq' kabhi ash'ar mein jaise hota nahin ilham munasib