shajar bhar mein jo ek patta hara sa dekhta hai wo

shajar bhar meñ jo ik pattā harā sā dekhtā hai vo

to is duniyā ke chehre ko dubārā dekhtā hai vo

zamīn-e-ḳhvāb bhī shahr-e-amāñ bhī niiñd rasta bhī

magar kis shauq se duniyā kā naqsha dekhtā hai vo

jo mujh ko dekhtā hai vo to sapne dekhtā huuñ maiñ

maiñ us ko dekhtā huuñ jab tamāshā dekhtā hai vo

sabhī hairān hote haiñ magar aise nahīñ hote

to apne aa.ine meñ kis kā chehrā dekhtā hai vo

khulī āñkheñ to ḳhā.if thā ki duniyā dekhtī hai sab

aur āñkheñ band kar lī haiñ to duniyā dekhtā hai vo

maiñ ruk jā.ūñ to ruk jaa.e maiñ chaltā huuñ to chaltā hai

mire raste ko kis manzil kā rastā dekhtā hai vo

shajar bhar mein jo ek patta hara sa dekhta hai wo

to is duniya ke chehre ko dubara dekhta hai wo

zamin-e-KHwab bhi shahr-e-aman bhi nind rasta bhi

magar kis shauq se duniya ka naqsha dekhta hai wo

jo mujh ko dekhta hai wo to sapne dekhta hun main

main us ko dekhta hun jab tamasha dekhta hai wo

sabhi hairan hote hain magar aise nahin hote

to apne aaine mein kis ka chehra dekhta hai wo

khuli aankhen to KHaif tha ki duniya dekhti hai sab

aur aankhen band kar li hain to duniya dekhta hai wo

main ruk jaun to ruk jae main chalta hun to chalta hai

mere raste ko kis manzil ka rasta dekhta hai wo