shakl jab bas gai aankhon mein to chhupna kaisa

shakl jab bas ga.ī āñkhoñ meñ to chhupnā kaisā

dil meñ ghar kar ke mirī jaan ye pardā kaisā

bā-adab haiñ tire sab kushta-e-nāz ai qātil

saañs leñge na dam-e-zabh taḌapnā kaisā

aap maujūd haiñ hāzir hai ye sāmān-e-nashāt

'uzr sab tai haiñ bas ab vā'da-e-fardā kaisā

terī āñkhoñ kī jo tārīf sunī hai mujh se

ghūrtī hai mujhe ye nargis-e-shahlā kaisā

haath baḌhte haiñ garebāñ kī taraf paañv nikāl

al-madad josh-e-junūñ sabz hai sahrā kaisā

ai masīhā yūñhī karte haiñ marīzoñ kā 'ilāj

kuchh na pūchhā ki hai bīmār hamārā kaisā

garm-bāzārī-e-ḳhurshīd-e-qayāmat huī sard

hashr meñ dāġh-e-mohabbat mirā chamkā kaisā

kyā kahā tum ne ki ham jaate haiñ dil apnā sañbhāl

ye taḌap kar nikal aa.egā sañbhalnā kaisā

muñh dikhā.e na ḳhudā hijr kī shab kā 'akbar'

ḳhauf is kā hai hameñ hashr kā dhaḌkā kaisā

shakl jab bas gai aankhon mein to chhupna kaisa

dil mein ghar kar ke meri jaan ye parda kaisa

ba-adab hain tere sab kushta-e-naz ai qatil

sans lenge na dam-e-zabh taDapna kaisa

aap maujud hain hazir hai ye saman-e-nashat

'uzr sab tai hain bas ab wa'da-e-farda kaisa

teri aankhon ki jo tarif suni hai mujh se

ghurti hai mujhe ye nargis-e-shahla kaisa

hath baDhte hain gareban ki taraf panw nikal

al-madad josh-e-junun sabz hai sahra kaisa

ai masiha yunhi karte hain marizon ka 'ilaj

kuchh na puchha ki hai bimar hamara kaisa

garm-bazari-e-KHurshid-e-qayamat hui sard

hashr mein dagh-e-mohabbat mera chamka kaisa

kya kaha tum ne ki hum jate hain dil apna sanbhaal

ye taDap kar nikal aaega sanbhalna kaisa

munh dikhae na KHuda hijr ki shab ka 'akbar'

KHauf is ka hai hamein hashr ka dhaDka kaisa